Путинни Бишкекда кутишмоқда. ЕИ санкциялари эълон қилинган куни Жапаров Кремлга борди

Қирғизистон президенти Садир Жапаров кеча, 23-апрел куни ишчи ташриф билан Россияга бориб, президент Владимир Путин билан музокара ўтказди. Бу ҳақда икки давлат раҳбарларининг матбуот хизматлари хабар берди.

Асосий мавзулар

Учрашувда Қирғизистон-Россия муносабатларини ривожлантириш, савдо-иқтисодий ҳамкорликни чуқурлаштириш ва аввалги келишувларни амалга ошириш жараёни муҳокама қилингани билдирилди. Шунингдек, томонлар минтақавий кун тартиби ва кўп томонлама форматдаги ҳамкорлик масалалари бўйича позицияларини мувофиқлаштирган.

ШҲТ саммитига таклиф

Садир Жапаров Владимир Путинни Шанҳай ҳамкорлик ташкилоти давлат раҳбарлари саммитига таклиф қилган. Саммит 31-август – 1-сентябр кунлари Бишкекда ўтказилади.

«Маълумки, биз кўплаб халқаро ташкилотларда, жумладан Шанҳай ҳамкорлик ташкилотида фаол аъзомиз. Жорий йил 31-август – 1-сентябр кунлари Бишкекда ШҲТ саммити бўлиб ўтади. Шу муносабат билан сизнинг ташрифингизни ва саммитда иштирокингизни интиқлик билан кутмоқдамиз», – деди Жапаров Путинга.

Россия позицияси

Владимир Путин таклиф учун миннатдорлик билдириб, интеграция бирлашмалари доирасида фаол ҳамкорликни давом эттириш ва устувор йўналишларда амалий ҳамкорликни кенгайтиришга тайёрлигини билдирди.

«Мен сизнинг юртингизда бутун делегациямизни қандай меҳмондўстлик билан қарши олганингизни эслайман. Ўшанда жуда самарали иш олиб борган эдик.

Шуни таъкидламоқчиманки, барча келишувларимиз бажарилмоқда. Икки томон жамоалари фаол ва жадал ишламоқда, ва бу иш натижалари Қирғизистон иқтисодий ўсиш суръатларида ўз аксини топмоқда», – деди Путин.

Якуний натижа

Музокаралар якунида томонлар икки томонлама ҳамкорликка қўшимча импульс бериш ва барча йўналишларда қўшма ташаббусларни изчил илгари суриш бўйича ўзаро интилишларини тасдиқлади.

ЕИ санкциялари

Европа Иттифоқи эса айнан шу куни Қирғизистонга нисбатан санкцияларни айланиб ўтишга қарши курашиш механизмини (anti-circumvention tool) илк бор қўллади. Европа Комиссияси маълумотларига кўра, энди Қирғизистонга рақамли дастур асосида бошқариладиган дастгоҳлар, шунингдек, маршрутизатор ва коммутаторлар каби телекоммуникация ускуналарини экспорт қилиш бутунлай тақиқланади. Бу қарор мазкур товарларнинг Қирғизистон орқали Россияга реэкспорт қилиниш хавфи юқори экани билан изоҳланмоқда.

Украинада уруш бошланганидан бери Қирғизистон Европадан келаётган санкция остидаги товарлар учун асосий хаблардан бирига айланган эди. Таҳлилларга кўра, Эстониядан Қирғизистонга экспорт ҳажми 10000 фоизга, Финляндиядан 3100 фоизга, Полша ва Германиядан эса 1000 фоиздан кўпроққа ошган. Иқтисодчиларнинг фикрича, Қирғизистон аслида Россияга йўналтирилган Европа экспортининг бош манзилига айланиб қолган.