O‘zbekiston aholi bandligi bo‘yicha 187 ta davlat orasida 114-o‘rinni egalladi

Xalqaro mehnat tashkilotining «Employment Index 2025» reytingida O‘zbekiston 187 ta davlat ichida 114-pog‘onadan joy oldi. Mamlakatdagi bandlik ko‘rsatkichi 55 foizni tashkil etmoqda. Bu ko‘rsatkich mehnatga layoqatli (15 yosh va undan katta) aholining qancha qismi tovar ishlab chiqarish yoki xizmat ko‘rsatish sohasida haq evaziga mehnat qilayotganini ifodalaydi.

Qo‘shnilarda vaziyat qanday?

Reyting ma’lumotlariga ko‘ra, Markaziy Osiyo va qo‘shni davlatlar orasida bandlik darajasi turlicha:

• Qozog‘iston — 29-o‘rin (67 foiz);

• Rossiya — 73-o‘rin (60 foiz);

• Qirg‘iziston — 111-o‘rin (55 foiz);

• O‘zbekiston — 114-o‘rin (55 foiz);

• Turkmaniston — 165-o‘rin (40 foiz);

• Tojikiston — 175-o‘rin (36 foiz).

Reytingning yuqori pog‘onalarini Qatar (87 foiz), Solomon orollari (83 foiz) va Madagaskar (83 foiz) kabi davlatlar egallab turibdi. Eng past ko‘rsatkichlar esa Somali (27 foiz) va Jibuti (24 foiz) kabi mamlakatlarda qayd etilgan.

Bu ko‘rsatkich nimani anglatadi?

Xalqaro mehnat tashkiloti mutaxassislarining ta’kidlashicha, bandlik darajasining yuqori bo‘lishi har doim ham mamlakatning iqtisodiy boyligidan dalolat bermaydi. Masalan, qator rivojlanayotgan davlatlardagi yuqori foizlar aholining asosan qishloq xo‘jaligida o‘z-o‘zini band qilgani yoki norasmiy sektorda ishlayotgani bilan izohlanadi.

O‘zbekiston egallagan 114-o‘rin mamlakat iqtisodiyotining ish o‘rinlari yaratish salohiyatini aks ettiradi. Biroq, bu indeks ish haqi miqdori yoki mehnat sharoitlari haqida ma’lumot bermaydi.

Bandlik indeksi qanday hisoblanadi?

Bandlik darajasi — bu mehnatga layoqatli aholi (15 va undan katta yoshdagilar) umumiy sonining qancha foizi haqiqatda ishlayotganini ko‘rsatuvchi ko‘rsatkichdir. Unga talabalar, uy bekalari va maosh olmasdan mehnat qilayotgan shaxslar kiritilmaydi.