Қирғизистоннинг собиқ президенти амалдаги президентга 8-10 йиллик қўшимча ваколат беришни таклиф қилди
Қирғизистоннинг биринчи президенти Асқар Акаев Иссиқкўл халқаро форумидаги чиқишида амалдаги президент Садир Жапаровга иқтисодий ислоҳотларни давом эттириш учун қўшимча ваколат бериш зарурлигини таъкидлади. Унинг фикрича, бундай натижаларга эришиш учун узоқ муддатли сиёсий барқарорлик талаб этилади.
Қирғизистоннинг 2005-йилги март инқилоби пайтида мамлакатдан қочиб кетган собиқ президенти Асқар Акаев Иссиқкўл халқаро форумида амалдаги президент Садир Жапаровга 8-10 йиллик қўшимча ваколат бериш кераклигини айтди. Унинг сўзларига кўра, Қирғизистон халқи кейинги ўн йил ичида иқтисодий мўъжизага эришишга қодир.
«Халқимиз Садир Жапаровни иқтисодиёт чуқур турғунликда ва ижтимоий-сиёсий кескинлик энг юқори чўққисига чиққан оғир даврда президент этиб сайлади. Аммо бугунги кунда Қирғизистон иқтисодиёти барқарор ўсиб бормоқда ва ижтимоий соҳада ҳам ижобий тенденциялар кўриниб турибди», — деди Акаев.
Шунингдек, у Хитой—Қирғизистон—Ўзбекистон темир йўли қурилиши ва Қирғизистоннинг БМТ Хавфсизлик Кенгаши аъзоси этиб сайланишига ҳам тўхталиб ўтди.
Асқар Акаев агар Қирғизистон халқи амалдаги президент Садир Жапаровга Қирғизистон иқтисодий мўъжизасига эришиш режасини амалга ошириш учун қўшимча ваколат берса, оқилона ҳаракат қилишини таъкидлади. Унинг фикрича, бундай иқтисодий ютуқларга эришиш учун камида саккиз-ўн йил керак бўлади.