Qozog‘iston iqtisodiyoti yil boshidan beri 3,6 foizga o‘sdi
Mamlakat iqtisodiyotida xomashyoga bog‘liq bo‘lmagan tarmoqlar roli kuchaymoqda. Qurilish, savdo va qayta ishlash sanoati YAIM o‘sishining asosiy manbasiga aylandi.
Qozog‘iston yalpi ichki mahsuloti 2026-yilning yanvar–aprel oylarida 3,6 foizga o‘sdi. Bunda qayta ishlash sanoatida ishlab chiqarish hajmi 9,9 foizga oshgan. Bu haqda Qozog‘iston milliy iqtisodiyot vazirligi matbuot xizmati ma’lum qildi.
To‘rt oy yakunlariga ko‘ra, sanoat ishlab chiqarishi ijobiy hududga chiqqan – jismoniy hajm indeksi 102,1 foizni tashkil etgan. Vazirlik ma’lumotiga ko‘ra, 2026-yil yanvar–aprel oylarida Qozog‘iston iqtisodiyotining o‘sishi o‘tgan yilning shu davriga nisbatan 3,6 foizni tashkil etgan.
Ayniqsa mashinasozlik sohasida yuqori o‘sish sur’atlari saqlanib qolmoqda – o‘sish 23,3 foizni tashkil etgan. Bu transport vositalari, qishloq xo‘jaligi va temiryo‘l texnikasi, elektr mahsulotlari hamda uskunalar ishlab chiqarish hajmining ko‘payishi bilan izohlangan.
O‘sish sur’ati yuqori sohalar
Shuningdek, quyidagi sohalarda ham yuqori o‘sish kuzatilgan:
yengil sanoat – 2,3 barobar;
mebel ishlab chiqarish – 41,7 foiz;
farmatsevtika – 35,2 foiz;
qurilish materiallari – 27,7 foiz;
kimyo sanoati – 18,4 foiz;
oziq-ovqat mahsulotlari ishlab chiqarishi – 14,4 foiz.
Ma’lumotlarga ko‘ra, yilning dastlabki to‘rt oyida iqtisodiyotdagi ijobiy dinamikani asosiy tarmoqlardagi barqaror o‘sish ta’minlagan.
Eng yuqori o‘sish sur’atlari quyidagi sohalarda qayd etilgan:
qurilish – 114,5 foiz;
transport va omborlash – 112 foiz;
qayta ishlash sanoati – 109,9 foiz;
savdo – 105,1 foiz;
qishloq xo‘jaligi – 103,6 foiz.
YAIMning real o‘sish tuzilmasi xomashyoga bog‘liq bo‘lmagan tarmoqlar, xususan qurilish, transport, savdo va qayta ishlash sanoatining roli kuchayib borayotganini ko‘rsatmoqda.