Қурилиш вазирлиги «New Port» қурилиши назорат остида эканини айтиб чиқди
Мажмуа жами 9 та блокдан иборат. Уларнинг 3 таси бўйича тегишли ишчи органнинг ижобий экспертиза хулосалари бор. Аммо қолган 6 та блокда ноқонуний қурилиш олиб борилган.
© Ijtimoiy tarmoqlarАввалроқ Тошкент шаҳрида ноқонуний уй қурган қурилиш компаниясига нисбатан жиноят иши қўзғатилганди. Қурилиш ва уй-жой коммунал хўжалиги вазирлигининг ёзишича, «New Port» мажмуасидаги қоидабузарликлар назоратсиз қолдирилмаган.
Ушбу қурилиш пойтахтнинг Яккасарой туманида «Mega Logistics Service» МЧЖ томонидан олиб борилмоқда. «New Port» мажмуаси жами 9 та блокдан иборат. Уларнинг 3 таси бўйича Архитектура ва шаҳарсозлик кенгаши ишчи органининг ижобий хулосаси ҳамда тегишли экспертиза хулосалари мавжуд. Ушбу блокларда қурилиш-монтаж ишларини бошлаш Тошкент шаҳар ҳудудий назорат инспекциясида белгиланган тартибда рўйхатдан ўтказилган.
Қолган 6 та блокда эса қурилиш-монтаж ишлари инспекциядан белгиланган тартибда рўйхатдан ўтказилмасдан олиб борилаётгани назорат тадбирлари давомида аниқланганди. Қурилиш қилаётган МЧЖга бир неча марта бажарилиши мажбурий бўлган ёзма кўрсатмалар берилган. Компаниядан қурилишни тасдиқланган шаҳарсозлик ҳужжатлари асосида давом эттириш ва объектларни инспекциядан тегишли тартибда рўйхатдан ўтказиш талаб қилинган.
Вазирликнинг таъкидлашича, кўрсатмаларда белгиланган талаблар бажарилмагани учун компаниянинг масъул мансабдор шахслари маъмурий жавобгарликка тортилган. Шунингдек, буюртмачининг техник назоратчисига нисбатан тақдимнома киритилиб, тегишли таъсир чоралари қўлланган. Вазирликнинг эслатишича, тўпланган материаллар ҳуқуқий баҳо бериш учун ҳуқуқни муҳофаза қилувчи органларга юборилган.
