Tramp NATOdan chiqishni ko‘rib chiqmoqda

AQSH prezidenti Donald Tramp Qo‘shma Shtatlarning NATOdan chiqish imkoniyatini ko‘rib chiqayotganini ma’lum qildi. U bu haqda «The Telegraph» nashriga bergan intervyusida aytdi va bu masala «jiddiy ko‘rib chiqilayotgan qaror» ekanini ta’kidladi.

Tramp o‘z chiqishida NATOni «qog‘oz yo‘lbars» deb atab, alyans uni hech qachon ishontira olmaganini bildirdi.

Eron mojarosi va ittifoqchilar pozitsiyasi

Prezident o‘z noroziligini, ayniqsa, Eron bilan bog‘liq mojaro fonida ittifoqchilar tomonidan yetarlicha qo‘llab-quvvatlov bo‘lmagani bilan izohladi.

Shu bilan birga, Tramp AQSHning Eron bilan bog‘liq harbiy harakatlari tez orada yakunlanishi mumkinligini bildirdi. Uning so‘zlariga ko‘ra, bu jarayon «ikki-uch hafta» ichida tugashi ehtimoldan xoli emas.

Vashingtondagi rasmiy pozitsiya

Avvalroq AQSH davlat kotibi Marko Rubio ham bu masalaga munosabat bildirib, Vashington NATOning mamlakat uchun ahamiyatini qayta baholashi mumkinligini qayd etgandi.

«Biz NATOning mamlakatimiz uchun qay darajada ahamiyatli ekanini qayta ko‘rib chiqishimizga to‘g‘ri keladi. Yakuniy qaror baribir prezidentda qoladi», — dedi u «Fox News» telekanaliga bergan intervyusida.

Rubioga ko‘ra, alyans ma’lum vaqt davomida AQSH manfaatlariga xizmat qilgan, ammo hozir uning samaradorligi va teng sheriklik tamoyili qayta ko‘rib chiqilishi zarur. U, shuningdek, Yevropa davlatlari tomonidan har doim ham kerakli darajada qo‘llab-quvvatlov bo‘lmayotganini tanqid qildi.