Трампга 321 та табиий бриллиантга эга узук совға қилинди

Антверпен олмаз саноати АҚШ президенти Доналд Трампга мамлакат мустақиллигининг 250 йиллиги муносабати билан 321 та табиий бриллиант билан безатилган эксклюзив узук совға қилди. Бу ҳақда AWDC (Антверпен жаҳон олмаз маркази) ташкилоти маълум қилди.

Ушбу узук Белгиянинг Антверпен шаҳри ва Қўшма Штатлар ўртасидаги тарихий савдо алоқаларини ўзида мужассам этади. Таъкидланишича, АҚШ ўнлаб йиллар давомида Антверпен табиий олмослари учун энг муҳим экспорт бозори бўлиб келмоқда. Совғани лойиҳалаштириш ва яратиш билан заргар ҳамда олмосларга ишлов берувчи Давид Готлиб шуғулланган.

Супербоул узукларидан илҳомланган дизайн ва байрам тадбирлари

AWDC маълумотларига кўра, узук дизайни машҳур Супербоул чемпионлик узукларидан илҳомланган бўлиб, унда АҚШ мустақиллигининг 250 йиллигига нозик ишоралар мавжуд. Мазкур ноёб заргарлик буюми 18 каратли олтин, 321 та табиий бриллиант ва 75 та қимматбаҳо тошдан махсус ушбу воқеа учун яратилган. Совғани мустақиллик юбилейига бағишланган байрам маросими вақтида АҚШ элчиси Билл Уайт қабул қилиб олди.

Маълумот ўрнида, АҚШ мустақиллигининг юбилейига бағишланган тадбирлар туркумини Оқ уй майдонида бўлиб ўтган тарихий UFC турнири очиб берган эди.