«Trump Mobile» телефонига депозит тўлаганлар ҳалигача қурилмасини олмаган
«Trump Mobile» смартфони учун 590 мингга яқин одам 59 миллион доллар депозит тўлаган, аммо компаниянинг янгиланган фойдаланиш шартларида тўланган депозит телефон қачондир ишлаб чиқарилиши ва етказиб берилишига кафолат бермаслиги маълум қилинган.
© Trump MobileАҚШ президенти Доналд Трамп оиласига тегишли «Trump Mobile» хизмати томонидан тақдим этилган T1 смартфони атрофидаги можаро яна кучайди. Қурилма учун олдиндан буюртма берган юз минглаб мижозлар 11 ойдан буён телефонни кутишда давом этмоқда.
Маълумотларга кўра, тахминан 590 минг киши смартфон учун 100 доллардан депозит тўлаган. Бу эса компания ҳисобида қарийб 59 миллион доллар маблағ тўпланганини англатади. Бироқ ҳозиргача бирорта ҳам телефон харидорларга етказилмаган.
T1 смартфони тақдимоти
T1 смартфони 2025 йил июн ойида кичик Доналд Трамп ва Эрик Трамп томонидан тақдим этилган эди. Қурилма 499 доллар нархда сотилиши ва «Trump Mobile»нинг ойига 47,45 долларлик тариф режаси билан ишлаши маълум қилинган.
Дастлаб компания смартфон «Made in the USA» — АҚШда ишлаб чиқарилишини таъкидлаган. Кейинчалик эса расмий сайтдаги таъриф «American-proud design» иборасига ўзгартирилди. Компания раҳбарлари кейинроқ телефоннинг асосий қисми хорижда ишлаб чиқарилиши, якуний йиғилиши эса АҚШда амалга оширилишини айтган.
Муддатлар бир неча марта кечиктирилган
Аввалига телефон 2025 йил август ойида етказилиши айтилган бўлса, кейин декабр, сўнг 2026 йил март ва апрел ойларига кўчирилган. Ҳозир эса сайтда ҳеч қандай аниқ чиқиш санаси кўрсатилмаган.
Компания шартларига киритилган янги ўзгаришларга кўра, депозит тўлови харид ҳисобланмайди ва у қурилманинг ишлаб чиқарилиши ёки етказиб берилишини кафолатламайди. Шунингдек, «Trump Mobile» телефон умуман сотувга чиқмаслиги мумкинлигини ҳам қайд этган. Мижозлар эса хоҳласа депозит маблағини қайтариб олиши мумкин.
