Яқин Шарқдан чиқиб кетиш бойларга қанчага тушаётгани маълум бўлди

Яқин Шарқдаги ҳарбий кескинлик сабаб минтақада бўлган бой шахслар хавфсиз ҳудудларга чиқиб кетиш учун юз минглаб доллар сарфлашга мажбур бўлмоқда. Хусусий самолёт орқали Европага учиш нархи 350 минг долларгача етган.

Феврал ойи охирида АҚШ ва Исроил томонидан Эронга қарши бошланган ҳарбий операция минтақадаги вазиятни кескинлаштирди. Шу пайтгача хавфсиз деб ҳисобланган Абу-Даби, Дубай, Доҳа ва Манама каби бойлар тўпланган шаҳарларда ҳам хавотир кучайди. Сабаби Теҳрон жавоб сифатида АҚШнинг минтақадаги ҳарбий базаларига зарбалар беришни бошлади.

Натижада минтақада бўлиб турган бой бизнесменлар ва халқаро компаниялар раҳбарлари Форс кўрфазини тарк этиш учун шошилмоқда. Ҳозирда Саудия Арабистони, айниқса Ар-Риёд шаҳри Яқин Шарқдан чиқиб кетишнинг асосий йўналишига айланган. Чунки минтақада тўлиқ қувват билан ишлаётган кам сонли аэропортлардан бири айнан шу ерда жойлашган.

Эвакуация жараёни

Эвакуация жараёни жуда қимматга тушмоқда. Хусусий хавфсизлик компаниялари Дубайдан Ар-Риёдгача тахминан 10 соатлик сафар учун йўлтанламас автомобилларидан иборат колонналар ташкил этмоқда. У ердан эса мижозлар Европа ёки бошқа хавфсиз давлатларга хусусий самолётлар орқали учирилмоқда.

«Semafor» нашри маълумотига кўра, эвакуация қилинаётганлар орасида йирик глобал молиявий компаниялар топ-менежерлари, минтақада дам олаётган миллиардерлар ҳамда хизмат сафари билан келган жуда бой шахслар бор.

Ар-Риёддан Европага фавқулодда чиқиб кетиш нархи

Фавқулодда чиқиб кетишга бўлган талаб кескин ошгани хусусий самолётлар ва транспорт хизматлари нархининг ҳам кўтарилишига олиб келди. Айни пайтда Ар-Риёддан Европа шаҳарларига хусусий рейслар нархи 350 минг долларгача етаётгани айтилмоқда.

Уммон султонлиги ҳудудида порт ва нефт танкерларига қилинган ҳужумлардан кейин бу мамлакат орқали чиқиш йўллари ёпилди. Шу сабаб Саудия Арабистони ҳозирча минтақадан чиқишнинг энг хавфсиз йўналишига айланди.

Ар-Риёддан 35 километр узоқликда жойлашган Қирол Холид халқаро аэропорти ҳозир асосий юкламани ўз зиммасига олган. Бешта йўловчи терминалига эга мазкур аэропорт Европa, Америка, Осиё ва Африка йўналишларида парвозларни давом эттирмоқда.