Ёнғин учун айбдорлардан товон ундириш тартиби жорий этилади

Олий Мажлис Қонунчилик палатаси ёнғин оқибатида етказилган зарар учун айбдорлардан товон ундириш тартибини жорий этишни назарда тутувчи қонун лойиҳасини биринчи ўқишда қабул қилди.

Ташаббус ёнғин хавфсизлиги тизимини тубдан янгилаш ва жавобгарлик механизмларини кучайтиришга қаратилган.

Мажлисда Фавқулодда вазиятлар вазирининг биринчи ўринбосари — штаб бошлиғи Санжар Зупаров амалдаги қонунчиликда айрим ҳуқуқбузарликлар учун фуқаролик жавобгарлигини суғурталаш талаби белгиланмаганини таъкидлади.

Унинг қайд этишича, 2009 йилда қабул қилинган «Ёнғин хавфсизлиги тўғрисида»ги қонун бугунги талабларга тўлиқ жавоб бермайди.

Янги лойиҳага кўра, бинолар тоифасидан келиб чиқиб ёнувчан қурилиш материалларидан фойдаланиш тақиқланади. Шунингдек, ёнғин натижасида етказилган зарарни қоплаш билан бирга, айбдордан қўшимча товон ундириш институти жорий этилади.

Қонун ташаббуси объектларни ёнғин хавфсизлиги талабларига мувофиқлиги бўйича мажбурий аудитдан ўтказиш тизимини йўлга қўйишни ҳам назарда тутади. Бозорлар, савдо комплекслари ва савдо-кўнгилочар марказларини ёнғиндан мажбурий суғурта қилиш тартиби жорий этилади.

Бундан ташқари, ҳокимларнинг ёнғин хавфсизлигини таъминлаш бўйича шахсий жавобгарлиги оширилади. Лойиҳа ва қурилиш-пудрат ташкилотлари ҳамда кўп квартирали уйларни бошқарувчи органларнинг мажбуриятлари аниқ белгилаб берилади.

Қонун лойиҳаси Маъмурий жавобгарлик тўғрисидаги, Жиноят-процессуал ва Жиноят кодексларига ўзгартиришлар киритишни ҳам назарда тутади. Суғурта талабларини бажармаслик, газни чакана сотиш тартибини бузиш ёки сохта аудиторлик хулосаси бериш учун маъмурий чоралар кучайтирилади.

Шунингдек, шаҳарсозлик соҳасида рухсат бериш жараёнларига ноқонуний аралашганлик учун маъмурий ва жиноий жавобгарлик белгиланади.

Эслатиб ўтамиз, Яшнободдаги савдо мажмуасидан ёнғин содир бўлиб, 3 яшар қизча ҳалок бўлган эди.

21 феврал куни эса Тошкентдаги «Изза» бозорида ёнғин содир бўлган.