Zelenskiyning bayonoti Trampning Ukraina bo‘yicha rejasini chippakka chiqarishi mumkin
Ukraina hech qanday hududiy yon bermasligini bildirgan Zelenskiy Donald Tramp rejasining asosiy qismiga zarba beradi, deb yozmoqda WP. G‘arbda muzokaralar bo‘yicha munosabatlar qizimoqda.
The Washington Post nashrining yozishicha, Volodimir Zelenskiyning «Ukraina hech qanday hududni bermaydi», degan qat’iy bayonoti AQSH prezidenti Donald Tramp taklif qilgan tinchlik rejasining samaradorligini jiddiy savol ostida qoldirdi. Zelenskiy Londonda Britaniya, Fransiya va Germaniya yetakchilari bilan uchrashuvdan so‘ng bu pozitsiyani yana bir bor ommaga ochiq bayon qildi. Unga ko‘ra, hech qanday tezlashtirilgan muzokara yoki tashqi bosim Ukrainadan o‘z yeridan voz kechishni talab qila olmaydi.
Zelenskiyning ta’kidlashicha, Ukraina qonunlari va xalqaro huquq normalari hududiy integratsiyani kafolatlaydi. U mamlakat hududining bir qismini berish – nafaqat siyosiy, balki axloqiy jihatdan ham mumkin emasligini qayd etdi. WP ma’lumotlariga ko‘ra, ushbu bayonot Tramp rejasining eng bahsli qismi — Donbassni Rossiyaga de-fakto topshirish tamoyilini inkor etadi va muzokaralar jarayonini jiddiy qiyinlashtiradi.
Nashr manbalarining ta’kidlashicha, Yevropa yetakchilari ham Ukraina pozitsiyasini qo‘llab-quvvatlamoqda. Ular Moskvaga kuch ishlatib chegaralarni o‘zgartirish imkonini berish kelgusida yangi bosqinlarga yo‘l ochishi mumkinligini aytishmoqda. Britaniya Bosh vaziri Kiyr Starmer har qanday kelishuv Ukraina uchun qattiq xavfsizlik kafolatlarini o‘z ichiga olishi kerakligini bildirdi.
WP manbalariga ko‘ra, Tramp rejasining dastlabki versiyasi Kiyev va Yevropa poytaxtlarida jiddiy xavotir uyg‘otgan. Ayrim tahlilchilar uni «Kreml manfaatlariga juda mos tushadigan», hujjat, deb baholagan. Ukraina va Yevropa tomonini qoniqtirmagan bir qator bandlar muzokaralar davomida chiqarib tashlangan bo‘lsa-da, hudud masalasida kelishuvga kelish imkonsiz bo‘lib turibdi.
Kiyev Vashington yetakchiligidagi diplomatik faoliyatni qo‘llab-quvvatlayotgan bo‘lsa-da, Ukraina rahbariyati Rossiyaning egallagan hududlarini mustahkamlab qo‘yadimi yoki yo‘qmi, degan savolda G‘arbning yaxlit pozitsiyasini kutayapti. Bu masala muzokaralarning keyingi bosqichida hal qiluvchi ahamiyat kasb etadi.
