Markaziy bank va Raqobat qo‘mitasi hamkorlik memorandumini imzoladi
Hujjat inflatsiyani pasaytirish, narxlar barqarorligini ta’minlash va bozorlarda sog‘lom raqobatni kuchaytirishga qaratilgan.
O‘zbekiston Respublikasi Markaziy banki hamda Raqobatni rivojlantirish va iste’molchilar huquqlarini himoya qilish qo‘mitasi o‘rtasida «Narxlar barqarorligini ta’minlash, bozorlarda raqobat muhitini shakllantirish va iste’molchilar huquqlarini himoya qilish bo‘yicha hamkorlik to‘g‘risida»gi Memorandum imzolandi.
Ma’lumotlarga ko‘ra, ushbu hujjat mamlakatda inflatsiya darajasini pasaytirish, tovar va xizmatlar bozorlarida raqobat muhitini rivojlantirish hamda iste’molchilar manfaatlarini himoya qilish bo‘yicha samarali hamkorlikni yanada mustahkamlashni ko‘zda tutadi. Tomonlar bozordagi narx shakllanishi jarayonlariga ta’sir etuvchi omillarni muvofiqlashgan holda tahlil qilish zarurligini alohida ta’kidlamoqda.
Memorandumning vazifalari
Memorandum doirasida inflatsiyaga ta’sir ko‘rsatuvchi bozor mexanizmlarini ilmiy asoslangan usullarda o‘rganish, asossiz narx oshishi holatlariga qarshi kurashish hamda monopol mavqening suiiste’mol qilinishiga barham berish masalalari ustuvor yo‘nalish sifatida belgilandi. Shuningdek, tarmoqlar kesimida narx shakllanishi jarayonlarining shaffofligini ta’minlash maqsadida o‘zaro axborot almashish tizimini yo‘lga qo‘yish rejalashtirilgan.
Iste’mol bozorida taklif omillarini chuqur tahlil qilish va ehtimoliy xatarlarni oldindan aniqlash ham Memorandumda muhim yo‘nalishlardan biri sifatida qayd etildi. Bu borada tomonlar harakatlarni muvofiqlashtirish, tahliliy ma’lumotlar bilan tezkor almashish orqali bozorda keskin narx tebranishlarining oldini olishni maqsad qilgan.
Inflatsiyani pasaytirishda institutsional hamkorlik
Hujjatda hamkorlikning aniq vazifalari ham belgilab berilgan. Jumladan, inflatsiyani pasaytirishda institutsional hamkorlikni kuchaytirish, tovar va xizmatlar bozorlarida sog‘lom raqobat muhitini shakllantirish, narxlarga ta’sir etuvchi monopol sharoitlarni tezkor aniqlash bo‘yicha axborot almashinuvini yo‘lga qo‘yish nazarda tutilgan.
Iste’molchilar huquqlarini himoya qilish
Shu bilan birga, bozor konsentratsiyasi darajasi, alohida tarmoq ishtirokchilari, monopol holatlar va bozor hukmronligini tahlil qilishda o‘zaro hamkorlik qilish hamda moliya bozorlarida iste’molchilar huquqlarini himoya qilishga oid normativ-huquqiy hujjatlar loyihalari bo‘yicha fikr almashish ham Memorandumning muhim qismi hisoblanadi.
Mutaxassislar fikricha, ushbu kelishuv davlat idoralari o‘rtasidagi muvofiqlashuvni kuchaytirib, bozorlarda barqarorlik va shaffoflikni oshirishga xizmat qiladi.
