Александр Вучич бир неча ҳафтадан сўнг президентликдан кетишини маълум қилди

Сербия президенти Александр Вучич бир неча ҳафтадан сўнг президентлик лавозимини тарк этишини маълум қилди. Бу ҳақда “Meduza” хабар берди.

27-июнь куни ўз тарафдорлари иштирокида ўтган митингда сўзга чиққан Вучич президентлик фаолияти якунланаётганини айтди.

“Менга президентликдан ҳеч қачон кетмайсан, дейишганди. Аммо республика президенти сифатидаги сўнгги кунларим ва ҳафталаримни ўтказяпман. Яна бир неча ҳафта президент бўламан, кейин эса истеъфога чиқаман”, — деди у.

Шу билан бирга, Вучич мамлакатда ўтказилиши кутилган парламент сайловларида иштирок этиш нияти борлигини билдирди. Аввалроқ, апрель ойида у парламентни муддатидан аввал сайлаш имкониятини кўриб чиқишга тайёрлигини айтган эди. Сайловлар куз фаслида ўтказилиши кутилмоқда.

Сўнгги ойларда Вучич бир неча бор лавозимини тарк этиши мумкинлигини таъкидлаган. Унинг амалдаги президентлик ваколати 2027-йилда якунланади. Сербия Конституциясига мувофиқ, бир шахс икки муддатдан ортиқ президентлик қила олмайди. Вучич аввалроқ Конституцияни ўзгартириш нияти йўқлигини ва “диктатор эмаслиги”ни билдирган эди.

Амалдаги президент Россия билан яқин муносабатлари билан танилган. 2025-йил май ойида у Россия ва Украина ўртасидаги кенг кўламли уруш бошланганидан бери биринчи марта Москвага ташриф буюриб, 9 май ғалаба парадида қатнашган.

Сербияда эса 2024-йил ноябридан буён талабалар бошчилигида оммавий норозилик намойишлари давом этмоқда. Намойишчилар муддатидан аввал президентлик сайловларини ўтказишни талаб қилмоқда.