«Анорбанк» 10 трлн сўмлик янги шўба корхона ташкил қилди
Янги шўба корхона — «Anor Tech» банкнинг аффилланган шахслари рўйхатига киритилган.
«Анорбанк» «Anor Tech» масъулияти чекланган жамиятини ташкил этди ва уни аффилланган шахслар рўйхатига киритди. Бу ҳақда Корпоратив ахборот ягона порталида маълумот берилди.
Қайд этилишича, «Anor Tech» корхонаси 2026-йилнинг 14- апрел куни давлат рўйхатидан ўтказилган. Корхонанинг устав фонди 10 миллиард сўмни ташкил этади.
Корхона раҳбари сифатида Гимадиев Сергей Абдулхаевич кўрсатилган. Маълумот учун, С. Гимадиев банк тизимидаги тажрибали менежерлардан бири ҳисобланади. У 2026-йил бошидан буён «Анорбанк» Кузатув кенгаши раисининг катта маслаҳатчиси лавозимида ишлаб келаётган эди. Бунга қадар эса «Apex Bank» бошқаруви раиси лавозимида фаолият юритган.
CAFA'га аъзолик
Ҳозирда «Anor Tech» Тошкент шаҳрининг Яшнобод тумани, Истиқбол кўчаси, 21-уй манзилида жойлашган. Жорий йил бошида банк «Central Asian Fintech Association» (CAFA)га аъзо сифатида қўшилишини эълон қилганди.
CAFA ва ANORBANK қуйидаги йўналишларда ҳамкорликни ривожлантиришни режалаштирмоқда:
• финтех инновациялари ва рақамли банкингни ривожлантириш;
• регуляторлар билан мулоқот ва рақамли иқтисодиёт соҳасидаги ташаббуслар;
• қўшма пилот лойиҳалар ва эксперт платформалари;
• Марказий Осиёда рақобатбардош, шаффоф ва барқарор молиявий экотизимни мустаҳкамлаш.
