«Apple» ўзининг энг арзон iPhone 17e моделини тақдим этди
Олдиндан буюртма бериш 4 мартдан бошланади, қурилма 11 мартдан сотувга чиқади.
«Apple» компанияси ўзининг буджетбоп смартфонлар линиясининг янги модели — iPhone 17e’ни тақдим этди.
Янги версия аввалги iPhone 16e модели каби бир хил дизайн ва экран ўлчамига эга. Хусусан, «Apple» iPhone 17e моделида «чёлка»ни (экран тепасидаги кесимни) сақлаб қолган.
Барча янгиланишлар янги моделнинг жиҳозланиши ва функцияларига тегишли бўлди. Шундай қилиб, iPhone 17e, худди қимматроқ iPhone 17 версияси каби, тирналишлардан ҳимояловчи такомиллаштирилган Ceramic Shield 2, янги A19 чипи ва MagSafe симсиз қувватлагичи билан жиҳозланган.
iPhone 17e 48 мегапикселли камера билан жиҳозланди. Унинг бошланғич хотираси эса iPhone 16e’дагига қараганда икки баравар кўпайтирилиб, 256 ГБ га етказилди.
Янги «бюджетбоп» айфоннинг нархи 599 доллардан бошланади. Смартфон учта рангда — қора, оқ ва пушти рангларда тақдим этилган ҳамда 11 мартдан сотувга чиқади.
