«Apple» яна дунёдаги энг қиммат компанияга айланди

«Apple» компанияси бозор капитализацияси бўйича «Nvidia»ни ортда қолдириб, яна дунёдаги энг қиммат оммавий компанияга айланди.

Компаниянинг бозор қиймати 4,9 триллион долларга етган бўлса, акциялари бироз арзонлашган «Nvidia»нинг капитализацияси 4,8 триллион долларга тушди.

Йил бошидан буён «Apple» акциялари 20 фоиздан ортиқ қимматлашган. Шу даврда «Nvidia» акциялари ҳам ўсган бўлса-да, уларнинг ўсиш суръати 10 фоиздан кам бўлган.

«Reuters» агентлигининг таъкидлашича, бу ўзгариш инвесторлар кайфиятидаги муҳим бурилишни кўрсатади. Энди сармоядорлар фақат сунъий интеллект бумидан фойда кўраётган компанияларга эмас, балки бошқа истиқболли технология бизнесларига ҳам фаолроқ сармоя киритмоқда.

Инвесторлар нима учун «Apple» ни танламоқда?

«BRI Wealth Management» инвестициялар бўлими раҳбари Тони Медоуснинг фикрича, аввал «Apple» сунъий интеллект пойгасида рақобатчиларидан ортда қолган бўлса, ҳозирда вазият ўзгарган.

Унинг таъкидлашича, компания сунъий интеллектни ривожлантиришга рақобатчиларга нисбатан камроқ маблағ сарфласа-да, экотизими, пуллик сервислари ва қурилмаларни мунтазам янгилаш ҳисобига барқарор даромад олиш имкониятига эга.

Экспертга кўра, «Apple» акцияларининг ўсиши сунъий интеллект атрофидаги қисқа муддатли қизиқиш эмас, балки компаниянинг узоқ муддатли молиявий барқарорлигига бўлган ишончни акс эттиради.

«Apple» тарихий рекордларни янгиламоқда

«Apple» илк бор 2011 йил августида бозор капитализацияси бўйича дунёдаги энг қиммат компанияга айланган эди. 2016 йилда у бу мақомни вақтинча «Alphabet»га бой берган.

2018 йил август ойида «Apple» бозор қиймати 1 триллион доллардан ошган илк оммавий компания сифатида тарихга кирган. 2024 йилда эса сунъий интеллект учун чипларга талаб кескин ошиши ортидан «Nvidia» биринчи ўринга чиққан эди. Энди эса «Apple» яна глобал рейтингда етакчиликни қайтариб олмоқда.