«BMW» афсонани электрлаштирмоқда: Мюнхенда 3-серия асосида янги «i3» тақдим этилди (фото)

Ўнлаб йиллар давомида «BMW»нинг 3-серияси немис концернининг энг оммабоп модели ва профессионал муваффақият рамзи бўлиб келган. Энди эса баварияликлар бу афсонани расман электр даврига олиб кирмоқда.

2026-йил 18-март куни «BMW» компанияси Мюнхенда тўлиқ электр седан – «i3» моделини тақдим этди. Бу сентябрда «iX3» кроссоверининг дебютидан кейин янги авлод линиясидаги иккинчи модел ҳисобланади. Янгилик такомиллаштирилган қувватлаш тизими ва инновацион рақамли интерфейсга эга бўлди.

900 км бир марта қувватлашда

«BMW» нафақат двигателни алмаштирди, балки ўзининг энг муҳим модели учун техник кўрсаткичлар планкасини сезиларли даражада оширди:

Захира масофаси: аккумулятор тўлиқ қувватланганида 900 км (WLTP цикли бўйича).

Тез қувватлаш: фақат 10 дақиқада тез қувватлаш станцияси орқали 400 км масофа учун энергия тўплайди.

Бозорга биринчи бўлиб «BMW i3 50 xDrive» модификацияси чиқади. Олд ва орқа ўқларда жойлашган икки электродвигател туфайли автомобил қуйидаги кучли кўрсаткичларга эга:

Умумий қувват: 345 кВт / 469 от кучига тенг.

Максимал айланиш моменти: 645 Нм.

Янги модел «BMW»нинг олтинчи авлод куч қурилмаси билан жиҳозланган. Унинг асосида 800 волтли аккумулятор бўлиб, янги цилиндрик элементлар туфайли энергия зичлиги 20 фоизга юқори.

Автомобил ўлчамлари тахминан 4,76 метр узунликда, ғилдирак базаси эса қарийб 2,9 метрни ташкил этади.

Шу билан бирга, «BMW» ички ёниш двигателига эга енгил гибрид (mild hybrid) версиясини ҳам тақдим этди. Ташқи кўриниш жиҳатидан у электр «i3» билан деярли бир хил бўлади, аммо бошқа ишлаб чиқариш қувватларида ишлаб чиқарилади. Келажакда плагин-гибрид (PHEV) версияси ҳам чиқиши кутилмоқда.

«Ars Technica» маълумотига кўра, интерер «iX3» моделига жуда ўхшаш, фақат том қисмидаги жой бироз камроқ. Бу марказий консолда жисмоний тугмалар мавжудлигини ва трапеция шаклидаги сенсорли мултимедиа тизими борлигини англатади.

Шунингдек, автомобил «Panoramic Vision» дисплейи ҳамда «Alexa» асосидаги сунъий интеллект ва овозни таниш функциясига эга шахсий ёрдамчи билан жиҳозланган. Орқа ўриндиқларда ҳам етарлича жой бор, гарчи йўловчилар олдинги ўриндиқларга нисбатан бироз баландроқ ўтирса ҳам.

«Tesla» ва «BYD» билан рақобат

Электромобиллар ва ички ёниш двигателига эга автомобиллар учун бир хил дизайн стратегияси трендга айланмоқда – бундай ёндашувни аллақачон «Mercedes-Benz» (GLC модели) ва «Porsche» (Cayenne Electric) қўлламоқда. Бироқ «BMW» учун бу катта таваккал ҳисобланади:

Рақобат: янги «i3»нинг мақсади электромобиллар бозори етакчилари – «Tesla» ва Хитойнинг «BYD» компаниясига жиддий рақобат қилиш.

Талаб: агар 3-сериянинг янги автомобилларига бўлган қизиқиш кутилгандан паст бўлса, Мюнхенда модернизация қилинган завод тўлиқ юкланмаслик хавфига дуч келади.

Нарх

«Bloomberg» таҳлилчилари таъкидлашича, премиум сегментда электромобиллар ва ички ёниш двигателига эга автомобиллар нархи аста-секин тенглашиб бормоқда, бу эса харидорлар учун танловни осонлаштиради. Янги «i3»нинг расмий нархи ҳозирча эълон қилинмаган.

«Neue Klasse» даври

Янги «i3» инновацион «Neue Klasse» платформасига асосланган бўлиб, уни ишлаб чиқишга «BMW» 10 млрд евродан ортиқ маблағ сарфлаган. Келаси йилгача компания ушбу база асосида 40 дан ортиқ янги ёки янгиланган моделларни, жумладан 7-серия ва «X5» кроссоверини чиқаришни режалаштирмоқда.

Қизиғи шундаки, ҳозирги «i3» 2013–2022-йилларда ишлаб чиқарилган, шу номдаги ғайриоддий хэтчбек билан деярли умумий жиҳатга эга эмас. Ўша пайтда «BMW» «пионерлар»ни излаган бўлса, бугунги кунда унинг мақсади – ўзининг содиқ мухлисларини электр тортувига ўтказишдир.

1975-йилдаги дебютидан буён «BMW»нинг 3-серияси ажойиб бошқарувга эга спорт автомобили сифатида обрў қозонди ва бренднинг энг муваффақиятли моделига айланди. Етти авлоддан сўнг ҳам унга бўлган талаб юқори даражада сақланиб қолмоқда: мухлислар ҳам, танқидчилар ҳам янги версия «соф ҳайдов завқи» рамзи мақомини тасдиқлашини кутмоқда.

Афсонавий заводни модернизация қилиш

«i3» ишлаб чиқарилишини йўлга қўйиш учун Мюнхендаги завод сўнгги 100 йил ичидаги энг йирик реконструкциядан ўтди. Янги кузов цехи ва инновацион йиғиш линияси қурилди. Бу «BMW»нинг бренд келажаги электрга боғлиқ эканига катта урғу бераётганини кўрсатади.