BRICS доллардан воз кечишга тайёрми?
Россия молия вазири Антон Силуановнинг таъкидлашича, BRICS бўйича ҳамкорлар доллар ҳисоб-китобларидан воз кечишга шошилмаяпти, шу сабабли муқобил тизим яратиш бўйича музокаралар секин бормоқда.
Россиянинг BRICS бўйича ҳамкорлари халқаро ҳисоб-китобларда доллардан воз кечишга тайёр эмас, чунки улар жиддий чекловларга дуч келмаяптилар. Бу ҳақда Россия молия вазири Антон Силуанов Молия университети форумида маълум қилди.
Унинг сўзларига кўра, бирлашма ичида Америка валютасига боғлиқликни камайтиришга имкон берадиган чегаралараро ҳисоб-китоблар тизимини яратиш бўйича музокаралар анча секин бормоқда.
Силуанов таъкидлаганидек, Россия BRICS мамлакатлари билан савдони «ишончли валюталар ва ишончли инфратузилма» орқали олиб боришга интилмоқда. У Москва хавфли деб ҳисоблаган жойларда доллардан фойдаланишни камайтираётганини эслатди.
«Агар ҳозир доллар ишончсиз бўлса, демак биз ундан фойдаланмаймиз. Кейинчалик нима бўлишини кўрамиз, таҳлил қиламиз», - деди вазир.
Шу билан бирга, Молия вазирлиги раҳбари Россиянинг ҳар қандай йўл билан долларсизлаштиришга интилиш мақсади йўқлигини айтди. Унинг сўзларига кўра, асосий вазифа барқарор ва башорат қилинадиган ҳисоб-китобларни таъминлашдир.
«Барқарор ҳисоб-китобларни таъминлаш вазифаси бор. Агар доллар ўзини ҳисоб-китобларда "рубильник" билан ўчирилиши мумкин бўлган валюта сифатида кўрсатган бўлса, бир зумда ҳисоб-китоблар тўхтайди. Қандай ишонч қолади?», - дея таъкидлади Силуанов.
У янада ишончлироқ ҳисоб-китоб механизмларига рақамли молиявий активлар ва криптовалюталарни киритди. Вазирнинг баҳолашича, Россия компаниялари анъанавий каналларнинг тўсиб қўйилиши хавфини камайтириш учун ташқи иқтисодий фаолиятда бундай воситалардан фойдаланишлари мумкин.
Аввалроқ АҚШ президенти Доналд Трамп бирлашма мамлакатлари долларга муқобил сифатида ўз валютасини яратган тақдирда 100 фоизлик бож тўлаш билан таҳдид қилган эди.
«BRICSнинг халқаро савдода АҚШ долларининг ўрнини эгаллаши учун заррача ҳам имконият йўқ. Буни амалга оширишга уринган ҳар қандай давлат дарҳол Америка билан хайрлашиши мумкин», - деган Америка раҳбари.
Кейинроқ Трамп бу огоҳлантиришлардан сўнг BRICS тез заифлашаётгани ва ҳеч қачон аҳамиятли бирлашмага айланмаслигини айтганди.
