Британиянинг собиқ бош вазири Microsoft компаниясига ишга кирди

Американинг технологик гиганти Microsoft Буюк Британиянинг собиқ бош вазири, Консерватив партия вакили Риши Сунакни катта маслаҳатчи сифатида ишга олди. Бу ҳақда PA Media агентлиги хабар берди. Маълумотларга кўра, Сунак компанияда қисман бандлик асосида фаолият юритади. Унинг вазифаси Microsoft’га макроиқтисодий ва геосиёсий тенденциялар бўйича маслаҳатлар бериш ҳамда компания номидан халқаро тадбирларда қатнашишдан иборат бўлади. Бироқ эҳтимолий манфаатлар тўқнашувини олдини олиш мақсадида Сунакка Британия сиёсатидан боғлиқ масалаларда маслаҳат бериш, лоббизм билан шуғулланиш ёки сиёсий алоқаларидан фойдаланиш қатъиян тақиқланган. Сунак Microsoft’дан оладиган барча маошини ўзининг рафиқаси Акшата Мурти билан биргаликда асос солган The Richmond Project хайрия жамғармасига йўналтиради. Бу ташкилот болаларда математика кўникмаларини ривожлантириш билан шуғулланади. Microsoft’дан ташқари, Сунак ҳозирда Сан-Францискода жойлашган сунъий интеллект стартапи Anthropic ҳамда молиявий гигант Goldman Sachs билан ҳам ишлайди. У 2001–2004 йилларда Goldman Sachs’да ишлаган. Эслатиб ўтамиз, Риши Сунак 2022 йил октябридан 2024 йил июлигача Британия бош вазири бўлган. Унинг партияси ўтган йилги умуммиллий сайловларда мағлуб бўлганидан сўнг, Сунак лавозимни тарк этган. Унинг ўрнига лейбористлар партияси етакчиси Кийр Стармер сайланган.