Endi dori vositalari uchun milliy «GMP» sertifikati talab etiladi

O‘zbekistonda dori vositalari va tibbiy texnika vositalarini ro‘yxatdan o‘tkazish tartibi yangilanadi. Bu haqda Adliya vazirligi xabar berdi. Yangi talablarga ko‘ra, tibbiy buyumlar davlat ro‘yxatidan o‘tkaziladi va inson hayotiga bog‘liq xavf darajasiga ko‘ra to‘rt toifaga ajratiladi. Bundan tashqari, ularni ro‘yxatga olish faqat klinik tadqiqotlar ijobiy natija berganda amalga oshiriladi. Dori vositalari uchun 2027 yil 1 yanvardan milliy «GMP» sertifikati talab etiladi. Tibbiy buyumlar esa 2027 yil 1 iyuldan ISO:13485 milliy standartiga muvofiqlik sertifikatisiz ro‘yxatdan o‘tkazilmaydi. Shuningdek, 2026 yildan barcha mahalliy va xorijiy ishlab chiqaruvchilar dori vositalarini ro‘yxatdan o‘tkazish yoki ro‘yxat muddatini uzaytirish uchun majburiy ravishda milliy GMP sertifikatini taqdim etishi shart. Ularga berilgan ro‘yxat guvohnomalari besh yillik muddatga ega bo‘ladi. Ilgari mahalliy ishlab chiqaruvchilarga berilgan doimiy guvohnomalar ham endi besh yillik hisoblanadi. Dori vositalari va tibbiy buyumlarni ishlab chiqarish faqat litsenziyaga ega korxonalar tomonidan, huquq egasi buyurtmasiga ko‘ra amalga oshiriladi. Shu bilan birga, tibbiy buyumlarni chakana sotish uchun litsenziya talab etilmaydi, faqatgina vakolatli organni xabardor qilishning o‘zi kifoya qiladi.