Эрдўғанга нисбатан Анвар Садат сценарийси асосида суиқасд тайёрлангани маълум қилинди
2016 йилда Туркия президенти Ражаб Тойиб Эрдўғанга нисбатан 1981 йилда Миср президенти Анвар Садатни ўлдириш сценарийси асосида суиқасд тайёрланган. Бу ҳақда Туркия Қуролли Кучларининг истеъфодаги бригада генерали Иброҳим Буюкбаш маълум қилди.
Генералнинг сўзларига кўра, 2016 йил 15 июлдаги давлат тўнтаришига уринишдан бироз олдин, Туркия президенти ҳарбий машғулотларда иштирок этиши керак бўлган, бироқ «шубҳали фаоллик» аниқлангач, дастур бекор қилинган. Буюкбашнинг таъкидлашича, кейинчалик Эрдўғанга суиқасд 1981 йилда Қоҳирадаги ҳарбий парад вақтида Миср президенти Анвар Садатнинг ўлдирилишига ўхшаш тарзда режалаштирилгани маълум бўлган.
«Давлат тўнтаришига уринишдан олдин президент Эрдўғанга нисбатан бир нечта суиқасдлар тайёрланган», — деб келтиради Yeni Akit газетаси Буюкбашнинг сўзларини.
Суиқасд сценарийси
Истеъфодаги генералнинг маълумотларига кўра, давлат тўнтаришига уринишдан уч ой олдин, Анқара исённи ташкиллаштиришда айблайдиган ва Туркияда тақиқланган ФЕТО (FETÖ) ташкилоти тарафдорлари президентни Мармарисда қўлга олишни, уни «Даламан» аэропортига олиб келиб, хорижий авиакомпания самолётига чиқаришни ва ўша ерда ўлдиришни режалаштирган эди.
Буюкбашнинг таъкидлашича, тергов материалларида Швейцариянинг «Albinati Aeronautics» компаниясига тегишли самолёт тилга олинган. Ушбу самолёт Эрдўған «Даламан»га етиб келишидан бироз олдин шошилинч парвоз учун рухсат сўраган ва президент аэропортни тарк этганидан кўп ўтмай рейс бекор қилинган. Генерал, шунингдек, жиноят ишида ушбу самолётнинг хорижлик йўловчилари ҳам қайд этилганини ва улар кейинчалик Туркияни тарк этганини қўшимча қилди.
Газета бу сўзларни тасдиқловчи бирорта далил келтирмаган. Ҳукумат эса ҳозирча генералнинг баёнотларига ҳеч қандай муносабат билдиргани йўқ.
Маълумот учун, 2016 йил 15 июлга ўтар кечаси Туркияда давлат тўнтаришига уриниш содир бўлиб, унинг оқибатида 250 дан ортиқ киши ҳалок бўлган. Ўша тунда Эрдўған Мармарисда ҳордиқ чиқараётган эди ва у кейинчалик суиқасдда айбланиб судланган ҳарбийлар етиб келишидан бироз олдин меҳмонхонани тарк этишга улгурган. Исён бостирилгач, Туркияда фитнага алоқадорликда гумон қилинганларга нисбатан кенг кўламли тергов ва суд жараёнлари ўтказилган.
Анвар Садатнинг ўлдирилиши
1981 йил 6 октябрда Қоҳира шаҳрида ҳарбий парад ўтказилаётган эди. Парад вақтида намойишдан ўтаётган ҳарбий юк машиналаридан бири президент ўтирган трибуна рўпарасида тўхтайди. Ундан ҳарбий формадаги фитначилар тушиб, кутилмаганда президент ва бошқа юқори мартабали амалдорлар томон гранаталар улоқтиради ва автоматлардан ўт очади. Натижада Анвар Садат ҳалок бўлади.
