KDB Bank Uzbekistan ўз улуши сотилиши ҳақидаги хабарларга изоҳ берди

Корея тараққиёт банки “KDB Bank Uzbekistan” АЖдаги улушини сотиш бўйича қарор қабул қилмаган. Бу ҳақда банк матбуот хизмати эълон қилган расмий баёнотда келтирилган.

Қайд этилишича, KDB Bank Uzbekistan Корея тараққиёт банкининг хориждаги муҳим шўъба банкларидан бири ҳисобланади. У ўз фаолиятини бош компаниянинг доимий кўмаги остида давом эттирмоқда.

Банк шунингдек, Ўзбекистон молия сектори ривожига ҳисса қўшиш ва мижозларга молиявий хизматлар кўрсатиш бўйича стратегик мақсадларига содиқ қолишини билдирган.

KDB Bank Uzbekistan 1997 йилда UzDaewoo Bank номи билан ташкил этилган. Банк Daewoo Securities компаниясининг халқаро фаолиятини кенгайтириш доирасида ташкил қилинган.

2006 йилда Корея тараққиёт банкининг кириб келиши ортидан банк UzKDB Bank номини олган. 2011 йилда KDB RBS NB Uzbekistan банкнинг назорат пакетини сотиб олишга қарор қилган. 2013 йилда эса RBS NB Uzbekistan ва UzKDB Bank бирлаштирилиб, KDB Bank Uzbekistan номи остида фаолият юрита бошлаган.

Банкнинг расмий сайтида келтирилган маълумотларга кўра, унинг акциядорлик капитали қуйидагича тақсимланган:

• Korea Development Bank — 86,32 фоиз;
• Ўзбекистон Миллий ташқи иқтисодий фаолият банки — 10,31 фоиз;
• «Туронбанк» — 3,37 фоиз.

Корея тараққиёт банкининг ўзи Жанубий Корея ҳукуматига тўлиқ тегишли. Демак, KDB Bank Uzbekistan акцияларининг асосий қисми Жанубий Корея давлат банки назоратида.

Корея тараққиёт банки қандай ташкилот?

Korea Development Bank 1954 йилда Жанубий Корея саноатини ривожлантириш ва йирик иқтисодий лойиҳаларни молиялаштириш мақсадида ташкил этилган. Банк мамлакатдаги саноат корхоналари ва иқтисодий ривожланишга қаратилган лойиҳаларни молиялаштиришда иштирок этади.

KDB Bank Uzbekistan эса Ўзбекистонда тижорат банки сифатида фаолият юритади. Унинг мижозлари орасида хорижий компанияларнинг маҳаллий шўъба корхоналари, қўшма корхоналар, савдо ва хизмат кўрсатиш ташкилотлари, дипломатик ваколатхоналар ҳамда халқаро компанияларнинг вакилликлари бор.