Эрон вақтинчалик сулҳни рад этди
Эрон вақтинчалик ўт очишни тўхтатиш таклифини рад этиб, доимий тинчлик ва санкцияларни бекор қилишни талаб қилди. Трампнинг Эронга қўйган дедлайни яқинлашмоқда.
Эрон Теҳрон ва Вашингтон ўртасида воситачилик қилаётган Покистонга ўт очишни тўхтатиш таклифи бўйича ўз жавобини юборди. Бу ҳақда IRNA агентлиги хабар бермоқда.
Эрон томонидан тақдим этилган режа ўнта банддан иборат. Унда Теҳрон вақтинчалик сулҳ таклифини рад этиб, бунинг ўрнига урушни бутунлай тўхтатишга эришиш зарурлигини билдирган.
Шунингдек, Эрон санкцияларни бекор қилишни ва Хўрмуз бўғози орқали кемаларнинг хавфсиз ўтиши учун протокол яратишни талаб қилмоқда.
«Reuters» агентлиги аввалроқ, 6-апрел куни Покистон АҚШ ва Эронга тинчлик режасининг ўз вариантини тақдим этгани ҳақида ёзган эди. Унда ўт очишни зудлик билан тўхтатиш ва кенгроқ тинчлик шартномасини муҳокама қилиш учун 15-20 кун давом этадиган фаол музокараларни бошлаш кўзда тутилган.
«Axios» нашрининг хабар беришича, АҚШ ва Эрон минтақавий воситачилар иштирокида 45 кунлик муддатга ўт очишни тўхтатиш шартларини ҳам муҳокама қилишмоқда. Нашр буни «жиддий кескинликнинг олдини олишга бўлган сўнгги уриниш» деб атаган — унинг маълумотларига кўра, АҚШ ва Исроилда Эрон энергетикасига оммавий зарбалар бериш режаси аллақачон тайёрлаб қўйилган.
АҚШ Президенти Доналд Трамп, агар Теҳрон яқин орада Ҳўрмуз бўғози орқали кемалар қатновини очмаса, Эрон бошига «дўзах ёғилиши»ни ваъда қилган эди. Трамп белгилаган муҳлат чоршанбага ўтар кечаси, 8-апрел куни тугайди.
