ФИФА рейтингида Ўзбекистон 52-ўринга тушди
Футбол бўйича Ўзбекистон миллий терма жамоаси ФИФАнинг янгиланган рейтинг жадвалида икки поғонага пастлади.
19 январ куни эълон қилинган натижаларга кўра, футбол бўйича Ўзбекистон миллий терма жамоаси ФИФА рейтингида икки поғона пастлаб, 52-ўринни эгаллади. Терма жамоа 1462,03 очко билан қайд этилган бўлиб, очколар миқдорида ўзгариш бўлмаган.
Ўзбекистон нега рейтингда пастлади?
Пасайиш жамоанинг ўйин натижалари билан эмас, балки халқаро мусобақалар натижаси орқали юзага келган. Хусусан, 19 ноябрдан бери Африка миллатлар кубоги доирасида ўтказилган ўйинлар ФИФА рейтингига таъсир қилган.
Ушбу мусобақада иштирок этган қитъа терма жамоалари ФИФА очколарини жамлаган бўлса, бошқа қитъалар ва жамоалар, жумладан Ўзбекистон миллий терма жамоаси, рейтинг очколарини берадиган расмий учрашувларда майдонга тушмади.
Натижада Африка жамоаларининг айримлари рейтингда юқори поғоналарга кўтарилди. AFCON финалигача етиб келган Марокаш миллий терма жамоаси кучли ўнликдан жой олди ва ўз позициясини сезиларли даражада яхшилади. Бу эса рейтингда бошқа жамоалар, жумладан Ўзбекистон учун нисбий пасайишга олиб келди.
Рейтингдаги етакчилар
ФИФА рейтингида ҳозирда етакчиликни Испания, Аргентина ва Франция терма жамоалари сақлаб қолмоқда. Кучли ўнликка, шунингдек, Англия, Бразилия, Португалия, Нидерландия, Марокаш, Белгия ва Германия жамоалари кирган. Айрим Европа терма жамоалари ҳам Африка жамоаларининг очко тўплаши сабаб ўз ўринларини йўқотган.
Аввал Ўзбекистон қайси ўринларда бўлган?
Тарихий натижаларга назар ташласак, Ўзбекистон миллий терма жамоасининг ФИФА рейтингидаги энг юқори кўрсаткичи 45-ўрин бўлиб, бу натижа 2006 йил 22 ноябрдан 2007 йил 14 февралгача сақланган. Энг паст натижа эса 1996 йил ноябрь ойида қайд этилган бўлиб, ўшанда жамоа 119-ўринни эгаллаган.
