GM электромобил ишлаб чиқаришни қисқартирмоқчи

«General Motors» электромобиллар билан боғлиқ айрим инвестицияларини бекор қилиб, 6 млрд долларлик ҳисобдан чиқариш киритишини маълум қилди. «Reuters»га кўра, қарор АҚШда электромобилларга талаб сусайиши ҳамда президент Доналд Трамп маъмуриятининг солиқ ва бюджет сиёсати ортидан бозор истиқболлари ноаниқлиги билан боғлиқ.

Компания регуляторга тақдим этган ҳужжатда ёзилишича, ушбу харажатлар режалаштирилган электромобил ишлаб чиқариш ҳажмларининг қисқартирилиши ва таъминот занжирида юзага келган оқибатлардан келиб чиққан. Бу қарор рақобатчи «Ford Motor» томонидан бир неча ҳафта аввал эълон қилинган, янада йирик электромобил қисқартиришидан сўнг қабул қилинди.

6 млрд долларлик қисқартиришнинг асосий қисми — 4,2 млрд доллари нақд харажат ҳисобланади. У таъминотчилар билан тузилган шартномаларни бекор қилиш ва келишувларни якунлашга тўғри келади. Таъминотчилар бозорда электромобил талаб юқори бўлади, деб ҳисоблаб, катта қувватларга тайёргарлик кўрган бўлган.

Шу билан бирга, GM ушбу қарор АҚШдаги тахминан ўн икки моделдан иборат электромобиллар қаторини қисқартиришга олиб келмаслигини билдирди. Компания бу моделларни истеъмолчилар учун мавжуд ҳолда сақлаб қолишини таъкидлади. Бу қарор тўртинчи чорак молиявий ҳисоботида алоҳида модда сифатида қайд этилади.

2026 йилда таъминотчилар билан музокаралар натижасида қўшимча харажатлар чиқиши мумкин, бироқ улар 2025 йилдаги электромобил билан боғлиқ қисқартиришлардан камроқ бўлиши кутилмоқда. Бу хабардан сўнг GM акциялари қўшимча савдоларда 2 фоизга пасайди, асосий сессия эса 3,9 фоиз ўсиш билан 85,13 долларда якунланди.

Маълумот учун, GM электромобилларга энг катта ставка қўйган автоконцернлардан бири ҳисобланади. Компания бош директори Мэри Барра мижозлар талаби асосий мезон бўлиб қолишини билдирган. 2024 йил охирида арзонроқ моделлар ҳисобига электромобил сотувлари ортиб, GM АҚШда Tesla’дан кейин иккинчи ўринга чиққан эди.