«iPhone Duo»ни синаб кўрган журналистлар ҳайратда: «Apple» нимани уддалади?

9 сентябр куни бўлиб ўтган «Apple» тақдимотида бошқа янги қурилмалар қаторида узоқ кутилган букланадиган айфон ҳам намойиш этилди. Компания тарихида биринчи марта ишлаб чиқарилган бундай смартфон «iPhone Duo» номини олди. Мазкур қурилма Ғарб журналистларини асосан икки жиҳати — мукаммал техник ечими ва ўта қиммат нархи билан ҳайратда қолдирди. Мутахассисларнинг таъкидлашича, смартфонни илк бор қўлига олган фойдаланувчи унга ҳақиқатан ҳам эҳтиёжи бор-йўқлиги ҳақида ўйлаб қолиши мумкин.

Версиясига қараб, «iPhone Duo» нархи 1999 доллардан 3199 долларгача баҳоланмоқда. «Bloomberg» нашрининг таъкидлашича, гарчи рақобатчиларнинг нархлари ҳам ундан кескин фарқ қилмаса-да, бу мазкур турдаги қурилмалар учун рекорд кўрсаткич ҳисобланади. Масалан, «Google Pixel 11 Pro Fold» ёки «Samsung Galaxy Z Fold8» нинг бошланғич моделлари атиги 100 долларга арзонроқ. Аммо энг илғор моделлар ўртасидаги тафовут сезиларли: энг қиммат «Fold8 Ultra» 2700 доллар турса-да, унинг хотираси «Duo» га қараганда икки баробар кичик.

Нашрнинг ёзишича, букланадиган айфоннинг бозорга чиқарилиши харидорлар смартфон учун шунча катта маблағ сарфлашга қанчалик тайёр эканини кўрсатувчи ўзига хос синов бўлади. Юқори нарх нафақат сўнгги пайтларда эҳтиёт қисмлар қимматлашгани ва танқислиги, балки муҳандислик ечимларининг ўта мураккаблиги билан ҳам изоҳланади. Шунга қарамай, «Apple» бошланғич нархни икки минг долларлик «психологик чегара»дан пастроқ ушлаб қолишнинг уддасидан чиққан.

Янги айфонни синаб кўришга улгурган Ғарб журналистлари ҳозирча қурилма ҳақида жуда илиқ фикр билдирмоқда. Хусусан, «The Verge» нашри таҳлилчилари смартфоннинг техник ижросини юқори баҳолаган. Уларнинг таъкидлашича, ички экраннинг жилосиз қопламаси нур қайтишини ажойиб тарзда бартараф этади, буклаш механизми эса ўта равон ишлайди.

«Engadget» таҳлилчиси Сэм Разерфорд «iPhone Duo»ни «Apple»нинг сўнгги ўн йилликдаги энг ҳайратланарли қурилмаси» деб атади. «The Verge» мухбирлари каби у ҳам ташқи дисплейдан ичкисига ўтишдаги равон анимацияга қойил қолган. Разерфорднинг сўзларига кўра, бу — «ҳақиқий санъат асари».

Журналистнинг қайд этишича, янги айфоннинг титан корпуси анчагина салмоқли — оғирлиги 254 грамм. Унга қиёслаганда, 201 граммлик Galaxy Z Fold8 сезиларли даражада юпқа ва енгил кўринади. Қолаверса, смартфон қай даражада букланганини аниқ илғайди ва ҳатто ярим очиқ ҳолатда ҳам бенуқсон ишлайверади.

Экраннинг жилосиз юзаси нафақат нур қайтишининг олдини олади, балки букланиш жойини ҳам усталик билан яширади. Тўғри, бошқа букланадиган смартфонлардаги каби бу қурилмада ҳам из мавжуд, лекин у деярли кўзга ташланмайди. Разерфорднинг ёзишича, бу изни кўздан кўра, бармоқ билан ушлаб кўриб ҳис қилиш осонроқ. Журналистга ёқмаган ягона нарса — орқа панелда учинчи камеранинг йўқлиги бўлган.

 «Ўзининг илк букланадиган смартфонини яратишда «Apple» рақобатчиларидаги энг илғор функциялар ва дастурий ечимларни моҳирлик билан умумлаштира олган. Энг муҳими, улар чинакам «Apple» маҳсулоти экани яққол сезилиб турадиган нафис корпусга жойлаштирилган», — дея хулоса қилади журналист.

«Gizmodo» муҳаррири Рэймонд Вонгнинг фикрича, «Apple» «шу пайтгача яратилган букланадиган смартфонлар ичида энг кўп орзу қилинган» қурилмани ишлаб чиққан. У компания янги смартфоннинг қўшимча имкониятларини операцион тизимга қай даражада мослаштира олганидан ҳайратда қолганини айтади. Шунингдек, Вонг ҳам бир экрандан бошқасига ўтиш анимациясини юқори баҳолаган.

Журналист «iPhone Duo» икки минг ёки ундан юқори нархга арзийдими-йўқми, бу борада ҳозирча аниқ хулосага кела олмаган. Унинг фикрича, бу саволга аниқ бир жавобнинг ўзи йўқ. Ҳаммаси қурилма функциялари маълум бир фойдаланувчи учун қанчалик керакли эканига боғлиқ.

«The Wall Street Journal» мухбири Никол Нгуен ўзини букланадиган смартфонларнинг ашаддий мухлиси эмаслигини таъкидлайди. Унинг фикрича, бундай қурилмаларнинг экрани ҳаддан ташқари катта ва техник жиҳатдан ноқулайликлари кўп. Аммо «iPhone Duo» уни барибир букланадиган смартфон – эҳтимол, «iPad mini» планшети ўрнига – сотиб олиш ҳақида ўйлаб кўришга ундаган.

Бироқ тақдимот Ғарб журналистларининг барчасида ҳам бирдек илиқ таассурот қолдиргани йўқ. Хусусан, «Mashable» нашри мухбири Ребекка Руис ўз мақоласида масалага бироз ғайриоддий ёндашиб, «Apple»нинг «iPhone Duo» ётоқхона тумбасида ажойиб уйғотгич вазифасини ўташи ҳақидаги мақтовига диққат қаратган.

Журналист Америка уйқу тиббиёти академияси тунда смартфонни ёнида олиб ётишни тавсия қилмаслигини эслатиб ўтган. Мутахассисларнинг фикрича, бу уйқу сифатига салбий таъсир кўрсатади, шу боис телефонни бошқа хонада қолдирган маъқул. Руис янги айфон ҳақида бошқа ҳеч қандай фикр билдирмаган.

Шуни ҳам қайд этиш керакки, уйғотгич функциясига бу қадар урғу берилгани «Apple»нинг «Samsung»даги рақобатчиларини ҳам кулдирди. Компаниянинг Америкадаги бўлинмаси тақдимот вақтида Х ижтимоий тармоғида бир нечта ҳазиломуз постларни эълон қилди.

«Бу шунчаки ётоқхона соати эмас. Бу қанақадир Суғур кунига ўхшаб кетяпти», — дея киноя қилинди.

Катта эҳтимол билан, бу ўринда «Apple» ўзининг букланадиган қурилмаси билан бошқа кўплаб ишлаб чиқарувчилар аллақачон босиб ўтган эски йўлдан юраётганига ишора қилинган.