Ishsiz qolganlarga vaqtliroq beriladigan pensiya, 84,1 mlrd dollarlik tashqi qarz va Qorabog‘dagi o‘zbek harbiylari — 1-oktabr dayjesti

Ayrim ishdan bo‘shatilgan xodimlarga muddatidan oldin pensiya tayinlanadi

Hukumatning 2026 yil 28-sentabrdagi (519-sonli) qaroriga muvofiq, mehnat shartnomasi alohida asoslarga ko‘ra bekor qilingan fuqarolarga muddatidan oldin yoshga doir pensiya tayinlashning yangi tartibi tasdiqlandi. Unga ko‘ra, umumiy mehnat staji 25 yildan kam bo‘lmagan 58–60 yoshdagi erkaklar hamda 20 yildan kam bo‘lmagan 53–55 yoshdagi ayollar YAIDXP orqali tegishli so‘rovnoma yuborishi mumkin. Agar mahalliy mehnat organi 3 oy davomida ushbu fuqarolarga maqbul ish topib bera olmasa, ular ishsiz deb e’tirof etiladi va Pensiya jamg‘armasiga muddatidan oldin pensiya tayinlash bo‘yicha taqdimnoma kiritiladi (bunda pensiya tayinlangach, ishsizlik nafaqasi to‘xtatiladi).

Shuningdek, mazkur reglament asosida xodim mehnat shartnomasi bekor qilingan kundan boshlab 30 kalendar kun ichida YAIDXP orqali murojaat qilsa, unga sobiq ish joyidan uchinchi oy uchun ham o‘rtacha oylik ish haqi olish huquqini beruvchi ma’lumotnoma taqdim etiladi (30 kundan keyingi murojaatlar ko‘rib chiqilmaydi). Ushbu davlat xizmatlari to‘liq bepul ko‘rsatiladi.

O‘zbekistonning tashqi qarzi oshdi

Markaziy bankning 2026 yil birinchi yarim yilligi yakunlari bo‘yicha hisobotiga ko‘ra, O‘zbekistonning umumiy tashqi qarzi 84,1 mlrd dollarga yetdi. Ushbu mablag‘ning 41,7 mlrd dollari davlat tashqi qarziga, 42,4 mlrd dollari esa korporativ (davlat kafolatisiz, xususiy sektor va banklar o‘z mablag‘lari hisobidan to‘laydigan) tashqi qarzlarga to‘g‘ri keladi. Davlat qarzi tarkibiga hisoblangan, ammo to‘lanmagan foizlar hamda bozor narxida qayta hisoblangan suveren xalqaro obligatsiyalar ham kiritilgan.

Shuningdek, hisobot davrida tashqi savdo aylanmasida ham sezilarli o‘zgarishlar kuzatilgan. Oltin sotuvining kamayishi ortidan umumiy eksport 8,6 foizga qisqarib, 15,4 mlrd dollarni tashkil qilgan (biroq oltinsiz tovarlar eksporti 27 foizga, xizmatlar eksporti esa 45 foizga o‘sgan). Shu bilan birga, import hajmi 24 foizga oshib, 28,8 mlrd dollarga yetganligi sababli tovar va xizmatlar savdosidagi taqchillik 13,4 mlrd dollarni tashkil etgan. Birlamchi va ikkilamchi daromadlarning ijobiy qoldig‘i bu farqni qisman qoplab, yakunda joriy operatsiyalar hisobi qariyb 6,2 mlrd dollarlik taqchillik bilan shakllangan.

O‘zbekiston, Qozog‘iston va BAA Pokiston portlariga chiquvchi yangi temiryo‘l loyihasini ishlab chiqadi

Qozog‘iston va O‘zbekiston transport vazirliklari hamda BAA Energetika va infratuzilma vazirligi o‘rtasida Pokistonning dengiz portlariga chiqish imkonini beruvchi «Qozog‘iston – O‘zbekiston – Afg‘oniston – Pokiston» (CASA) temiryo‘l loyihasini birgalikda tayyorlash bo‘yicha o‘zaro anglashuv memorandumi imzolandi. Mazkur tashabbus Markaziy va Janubiy Osiyo o‘rtasidagi transport uzviyligini ta’minlash hamda xalqaro yuk tashish va logistika yo‘laklarini rivojlantirishni ko‘zda tutadi.

Kelishuv doirasida tomonlar zarur infratuzilmalarni barpo etishning maqsadga muvofiqligi yuzasidan texnik va iqtisodiy tadqiqotlar olib boradi. Shuningdek, Qozog‘iston va O‘zbekistonning tranzit salohiyati hamda BAAning investitsion va logistik tajribasini birlashtirgan holda loyihaning moliyaviy va texnik jihatlarini kompleks o‘rganish uchun maxsus Ishchi guruh tuzish ko‘rib chiqilmoqda.

O‘zbekiston, Ozarboyjon va Turkiya harbiy hamkorlikni kuchaytirmoqda

Joriy yilning 21-sentabridan 1-oktabriga qadar Ozarboyjonning Qorabog‘ iqtisodiy hududidagi «Qizilg‘a» o‘quv markazida O‘zbekiston, Ozarboyjon va Turkiya harbiy xizmatchilari ishtirokida «Birlik kuchi — 2026» qo‘shma harbiy mashg‘ulotlari bo‘lib o‘tdi. Jarayonlarni Ozarboyjon mudofaa vaziri Zokir Hasanov, Turkiya milliy mudofaa vaziri Yashar Gyuler va O‘zbekiston mudofaa vaziri Shuxrat Xolmuxamedov bevosita kuzatib bordi.

Mashg‘ulotlar davomida aholi yashash punktlarida jang olib borish, hududlarni minalardan tozalash, shartli terrorchilar egallagan quruqlik va dengiz obyektlarini ozod qilish, garovdagilarni qutqarish hamda dronlar hujumiga qarshi harakatlar kabi turli jangovar ssenariylar amalda sinovdan o‘tkazildi. Qo‘shma tadbirlar doirasida O‘zbekiston va Ozarboyjon mudofaa vazirliklari o‘rtasida 2027 yilga mo‘ljallangan ikki tomonlama harbiy hamkorlik rejasi ham imzolandi.