ЖССТ: Европа ва Марказий Осиёда ҳар учинчи ўлим алкогол билан боғлиқ
ЖССТнинг янги ҳисоботига кўра, Европа ва Марказий Осиёда жароҳат ва зўравонлик билан боғлиқ ҳар учинчи ўлим ҳолати спиртли ичимликлар истеъмоли оқибатида юз беради.
Европа ва Марказий Осиё мамлакатларида шикастланиш ҳамда зўравонлик туфайли юз бераётган ҳар учинчи ўлим ҳолати спиртли ичимликлар истеъмоли билан чамбарчас боғлиқ. Бу ҳақда Жаҳон соғлиқни сақлаш ташкилоти (ЖССТ) томонидан эълон қилинган янги тадқиқот маълумотларида айтиб ўтилган.
Ташкилот мутахассисларининг таъкидлашича, алкогол истеъмоли оқибатида юзага келаётган фожиалар кўлами йилдан йилга кенгайиб бормоқда.
Ҳисоботда келтирилишича, мастлик ҳолатида юз берадиган ўлим ҳолатларининг аксарияти ўз-ўзига шикаст етказиш, йўл-транспорт ҳодисалари ва тепадан сакраш билан боғлиқдир. Экспертларнинг фикрича, бошқа ҳеч бир психоактив модда жамиятга алкогол каби кенг кўламли, ҳам тасодифий, ҳам қасддан қилинган зарар етказмайди. Бу иқтисодий ва ижтимоий жиҳатдан мамлакатлар учун катта йўқотиш ҳисобланади.
ЖССТнинг алкогол масалалари бўйича минтақавий маслаҳатчиси Карина Феррейра-Боржеснинг қайд этишича, ушбу модда нафақат саратоннинг етти тури каби оғир юқумли бўлмаган касалликларни келтириб чиқаради, балки инсоннинг ўз хулқ-атворини назорат қилиш қобилиятини ҳам кескин пасайтиради. Бу эса кундалик ҳаётда хавфли вазиятларнинг юзага келишига тўғридан-тўғри таъсир кўрсатади.
Спиртли ичимликлар таъсирида координация ва реакциянинг ёмонлашиши инсонни таваккалчиликка мойил қилиб қўяди. Оқибатда, олдини олиш мумкин бўлган жароҳатланишлар ва бахтсиз ҳодисалар сони ортиб боради. Мутахассислар ушбу муаммони ҳал қилиш учун давлат даражасидаги қатъий чораларни кўриш ва аҳоли ўртасида тушунтириш ишларини кучайтириш зарурлигини таъкидламоқда.
