Киев «босим остида»: Зеленский Трампнинг талабини рад этмоқда

АҚШ ва Украина ўртасида Берлинда ўтаётган музокаралар Донбасс мақоми масаласида энг кескин босқичга кирди: Америка томони Киевдан Донбассдаги барча қўшинларини тўлиқ олиб чиқишни талаб қилмоқда, бироқ Украина президенти Владимир Зеленский бу шартларни қабул қилишни кескин рад этмоқда. Вашингтоннинг бу талаби Киев учун «қизил чизиқ» ҳисобланади.

Агентлик хабарига кўра, Берлиндаги музокараларнинг биринчи раунди беш соатдан ортиқ давом этган. Унда АҚШ президентининг махсус вакили Стив Уиткофф ва Оқ уй маслаҳатчиси Жаред Кушнер иштирок этди. Америка делегацияси икки кунлик мулоқот давомида ҳам Донбасснинг урушдан кейинги мақоми бўйича асосий масалада қаттиқ туриб олди. Вашингтон омма олдида музокараларда «жараён» ҳақида гапирган бўлса-да, ёпиқ эшиклар ортида тортишув кескин ўтган ва томонлар ҳатто асосий пунктга яқинлашмаган .

AFP агентлиги манбаларининг маълум қилишича, америкалик музокарачилар Украинадан Донецк областидаги эгаллаб турган позицияларини тарк этишни тўғридан-тўғри талаб қилмоқда. Киев расмийлари эса ўт очишни тўхтатиш фақат ҳеч қандай ҳудудий ён беришларсиз амалга оширилиши мумкин, деб ҳисоблайди. Агентлик манбасига кўра, Киев АҚШ талабига рози бўлмаяпти ва уни Россия позициясининг такрори сифатида қабул қилмоқда.

Манбалардан бири: «Путин ҳудудларни истайди ва америкаликлар ҳам айнан шунга эришмоқчи», - деб изоҳлади. Бу мантиқ украин делегациясидаги кескинликни кучайтирмоқда. Киев минтақадаги энг яхши мустаҳкамланган шаҳарлар — Краматорск ва Славянскни жангсиз ташлаб кетишдан бош тортмоқда.

Россия бу шартни яширмайди. Президент Владимир Путин аввалроқ Украина Қуролли Кучларини Донбассдан олиб чиқишни тинч йўл билан ҳал қилишнинг асосий элементи деб атаган эди. Шунингдек, у Россия минтақанинг бутун ҳудуди устидан «ҳарбий ёки дипломатик йўл билан» назорат ўрнатишини айтган.

Шу билан бир вақтда, Зеленский муросага уринмоқда. У НАТОга кириш истагидан воз кечишга рози аммо фақат АҚШ ва Европа томонидан юридик жиҳатдан мажбурий хавфсизлик кафолатлари эвазига. Шу билан бирга, унинг сўзларига кўра, ҳудудий масалани фақат Украина халқи сайловлар ёки референдум орқали ҳал қилиши мумкин.