НАТО бош котиби: «Путинда пул ҳам, аскар ҳам, ғоя ҳам қолмаяпти»

Лондонда «кўнгиллилар коалицияси» учрашувидан кейин бўлиб ўтган матбуот анжуманида НАТО бош котиби Марк Рютте Россиянинг ҳарбий ва иқтисодий салоҳияти издан чиқаётганини билдирди.

«Юз минглаб россияликлар Путиннинг тажовузи йўлида ҳалок бўлмоқда. Украина эса мардонавор ҳимояланмоқда ва биз берган ёрдам ўз самарасини бермоқда. Ҳақиқат шундаки, Путинда пул ҳам, аскар ҳам, ғоя ҳам тугаяпти», — деди Рютте.

Унинг таъкидлашича, Россия армияси фронтда фақат озгина илгарилашларга эришмоқда, аммо бу катта йўқотишлар эвазига амалга ошмоқда. НАТО раҳбари шу билан бирга АҚШ президенти Доналд Трампнинг жангларни мавжуд фронт чизиғида тўхтатиш ҳақидаги таклифини қўллаб-қувватлади. «Россияга босимни кучайтириш ва Украина учун адолатли тинчликни ўрнатиш вақти келди», — деди у.

Рютте Европа иттифоқи давлатлари ва Канада томонидан Киевга берилаётган қўшимча ҳарбий ёрдамни ҳам олқишлади.

«Майдондаги воқеалар Украинага бўлган қўллаб-қувватловимиз иш берганини кўрсатмоқда. Биз шу йўналишда давом этишимиз керак», — деди НАТО бош котиби.

16 октябрда Рютте НАТО мамлакатларининг Россияга нисбатан иқтисодий ва ҳарбий устунлигини эсга солган эди. «Биз Россиядан 25 баробар каттамиз. НАТО иқтисодиёти 50 трлн доллар, Россияники эса бор-йўғи 2 трлн — бу Техас штати даражасида», — деган у, Москва салоҳиятини ортиқча баҳоламасликни чақирган.

Бундан бир неча кун аввал Словенияда сўзга чиққан Рютте Россия денгиз флоти ҳолатини киноя билан изоҳлаб, «Москва энди фақат биттагина ишдан чиққан сувости кемаси билан мақтана олади», деган. «Бу энди «Қизил Октябрни қидириш» эмас, балки «энг яқин механикни қидириш»га айланди», — деган НАТО раҳбари Тoм Клэнсининг машҳур романига ишора қилиб.