Нурлан Сабуров атрофида янги можаро: унинг устидан прокуратурага ариза тушди
Қозоғистонлик фаол стендап комик Нурлан Сабуровнинг «Вагнер» хусусий ҳарбий компаниясига ёрдам бергани бўйича текширув талаб қилди: иш ҳуқуқий баҳсга айланмоқда.
Қозоғистонлик фаол Марат Туримбетов Нурлан Сабуровнинг эҳтимолий равишда ҳарбий ҳаракатларни молиялаштиргани юзасидан Бош прокуратурага ариза берганини маълум қилди. Бу ҳақда у ижтимоий тармоқда ёзди.
Туримбетов Сабуров томонидан Россиядаги «махсус ҳарбий амалиёт»ни қўллаб-қувватлаш эҳтимоли текширилишини талаб қилган. Унинг таъкидлашича, агар бу айбловлар асоссиз бўлиб чиқса, у Қозоғистон қонунчилигига мувофиқ жавобгарликни ўз зиммасига олишга тайёр.
«Тегишли органлар бу масалани ўрганади. Агар бу ёлғон чақимчилик бўлса, мен қонун олдида жавоб беришга тайёрман», — деди фаол.
Айни пайтда Қозоғистон Бош прокуратураси бу борада расмий баёнот эълон қилмаган.
Ҳуқуқий баҳслар
Сиёсатшунос Талгат Калиев ушбу можаро юзасидан фикр билдириб, агар Сабуров ҳақиқатан ҳам учинчи давлатнинг ҳарбий ҳаракатларини молиялаштирган бўлса, бу ҳолат Жиноят кодекси доирасига тушиши мумкинлигини таъкидлади.
Унинг сўзларига кўра, ваколатли органлар ҳуқуқий баҳо бериши зарур, чунки бу келажакдаги ўхшаш ҳолатлар учун намунавий прецедент бўлиши мумкин.
«Қозоғистон фуқаролари инсон ҳаётини сақлаб қолишга ёрдам бериши мумкин, аммо қотилликларни рағбатлантиришга ҳақли эмас», — деди Калиев.
Можаро контексти
ОАВ ва ижтимоий тармоқларда тарқалган видеода Сабуров гўёки Россия томонида жанг қилаётган «Вагнер» легионига 10 та эндуро мотоцикл топширгани айтилмоқда. Видео мазмуни расмий равишда тасдиқланмаган.
Бу ҳолат Сабуровнинг Россиядаги фаолияти атрофидаги баҳслар фонида янада кучайди. Унга нисбатан Россияда ҳам турли танқидлар янграётгани хабар қилинмоқда.
Ҳозирча ҳуқуқни муҳофаза қилувчи органлар томонидан жиноят иши қўзғатилгани ёки текширув бошлангани ҳақида расмий маълумот берилмаган. Мавзу жамоатчилик ва экспертлар диққат марказида қолмоқда.
