Ўзбекистон бешта давлат банкини хусусийлаштиришни режалаштирмоқда

Ўзбекистон ҳукумати банк тизимида давлат иштирокини босқичма-босқич камайтиришни режалаштирмоқда. Жамоатчилик муҳокамасига қўйилган янгиланган «Ўзбекистон–2030» стратегияси лойиҳасига мувофиқ, 2030 йилга қадар бешта давлат банки хусусийлаштирилади. Натижада давлат ихтиёрида атиги тўртта банк қолиши режалаштирилган.

Ҳозирги кунда тўққизта банк давлат тасарруфида фаолият юритмоқда. Улар қаторига Ўзмиллийбанк, Агробанк, Ўзсаноатқурилишбанк, Асакабанк, Халқ банки, Бизнесни ривожлантириш банки, Микрокредитбанк, Алоқабанк ва Туронбанк киради.

2026 йилдаёқ давлат банклари сони саккизтагача қисқаради, кейинги йилларда эса ҳар йили камида битта банк хусусийлаштирилиши кўзда тутилган.

Стратегияга мувофиқ, давлат банкларининг банк тизими активларидаги улуши ҳам камайтирилади. Агар 2026 йилда бу кўрсаткич 65 фоизни ташкил этган бўлса, 2030 йилга келиб у 55 фоизгача туширилиши режалаштирилган. 2025 йил 1 декабр ҳолатига кўра, давлат улуши мавжуд банклар ҳиссасига жами активларнинг 64,53 фоизи, яъни 576,2 трлн сўм тўғри келган.

Иқтисодчи Отабек Бакировнинг фикрича, 2026 йилда Алоқабанк ёки Туронбанк хусусийлаштирилиши мумкин. Шунингдек, давлат банклари активлар улушини қисқартириш режаларига қараб, Ўзсаноатқурилишбанк ёки Асакабанк 2028 йилгача сотилиши эҳтимолдан холи эмас.

Маълумот учун, Европа тикланиш ва тараққиёт банки хусусийлаштиришга тайёргарлик доирасида Асакабанкнинг 15 фоиз акциясини сотиб олди ва 2026 йилда давлат банки акциядорлари таркибига киради.

Иқтисодиёт ва молия вазирлигининг молиявий стратегиясига кўра, Ўзсаноатқурилишбанкни хусусийлаштиришнинг якуний босқичи 2025–2026 йилларда амалга оширилиши режалаштирилган, қолган учта банк эса 2026–2027 йилларда сотувга чиқарилиши мумкин.

Шу билан бирга, Ўзмиллийбанк, Агробанк, Микрокредитбанк, Халқ банки ва Бизнесни ривожлантириш банкини 2026–2028 йиллар давомида хусусийлаштириш режалаштирилмаган.