O‘zbekiston tashqi savdo aylanmasini 23 foizga oshirdi: eksportda oltin va oziq-ovqat yetakchi
Joriy yilning yanvar–sentyabr oylarida O‘zbekiston o‘z tashqi savdo hajmini 59,79 mlrd dollarga yetkazdi. Eksport 33 foizga o‘sib, 26,6 mlrd dollarni tashkil etdi, asosiy ulushni oltin, oziq-ovqat, gaz va kiyim-kechak tashkil qildi.
O‘zbekistonning tashqi savdo aylanmasi 2025 yilning yanvar–sentyabr oylarida 59,79 mlrd dollarga yetdi, deb xabar berdi Milliy statistika qo‘mitasi. Bu o‘tgan yilga nisbatan 22,9 foiz ko‘p. Eksport hajmi $26,6 mlrd (+33,3 foiz)ga, import esa $33,11 mlrd (+15,6 foiz)ga o‘sdi. Tashqi savdo defitsiti $6,42 mlrdgacha qisqardi (o‘tgan yilda bu ko‘rsatkich 8,62 mlrd dollar edi).
Oltin eksporti yil boshidan buyon keskin oshdi: sentyabrda 1,47 mlrd dollarlik oltin sotilib, yillik ko‘rsatkich 9,89 mlrdga yetdi (+70,9 foiz). Bu 2023 yildagi tarixiy rekorddan ham yuqori. Boshqa yirik eksport yo‘nalishlaridan kimyo mahsulotlari (1,52 mlrd dollar), oziq-ovqat (2,04 mlrd dollar) va tayyor mahsulotlar (1,26 mlrd dollar) katta ulushga ega bo‘ldi. Oziq-ovqat eksportda 41 foizga o‘sib, mevalar va don mahsulotlari yetakchilik qildi.
Gaz eksporti 15,4 foizga o‘sib, 546,2 mln dollarga yetdi, elektr energiyasi eksporti esa yarim barobar ko‘payib, 114,8 mln dollarni tashkil etdi. Shu bilan birga, avtomobil eksporti 23,8 foizga pasayib, 220 mln dollargacha tushdi.
Import bo‘yicha yetakchi sohalar — mashinasozlik (11,22 mlrd dollar, +11 foiz), sanoat mahsulotlari (5,27 mlrd dollar, +22,6 foiz) va kimyo mahsulotlari (4,08 mlrd dollar, +17,6 foiz). Mahsulotlar orasida temir, po‘lat va avtomobil ehtiyot qismlari importi keskin ko‘paygan, shu bilan birga tayyor mashinalar importi 18 foizga qisqargan.
Turizm, transport va IT xizmatlaridan tushumlar ham oshdi: xizmatlar eksporti 6,76 mlrd (+31,6 foiz), importi esa 3,64 mlrd (+34,9 foiz)ni tashkil qildi.
Asosiy savdo hamkorlari orasida Xitoy (11,41 mlrd dollar) va Rossiya (9,39 mlrd dollar) yetakchilik qilmoqda.
