Ўзбекистонда олтин қуймалари нархи рекордни янгилади
Марказий банк эълон қилган янги нархларга кўра, 5 граммлик олтин қуймаси 8,9 миллион сўмдан ошиб кетди.
Ўзбекистонда олтин қуймалари нархи яна тарихий энг юқори даражага чиқди. Марказий банк 25 декабрь куни учун ўлчовли олтин қуймалари бўйича расмий сотиш нархларини эълон қилди ва бу кўрсаткичлар мамлакатда олтин қуймалари савдоси бошланганидан бери энг юқори даража сифатида қайд этилди.
Маълумотларга кўра, 1 грамм олтин қуймасининг нархи 1 миллион 788 минг сўмни ташкил этмоқда. Бу бир кун ичида 0,3 фоизга ўсган бўлиб, йил бошидан буён ўсиш суръати 60 фоизга етди.
Марказий банк белгилаган нархларга асосан, 5 граммлик олтин қуймаси 8 миллион 942 минг сўмдан, 10 граммлиги 17 миллион 884 минг сўмдан сотилмоқда. Шунингдек, 20 граммлик қуйманинг қиймати 35 миллион 767 минг сўм, 50 граммлик қуйманики 89 миллион 418 минг сўмни ташкил этмоқда. Энг йирик, 100 граммлик олтин қуймаси эса 178 миллион 836 минг сўмга баҳоланган.
Қайд этилишича, жорий йил давомида олтин нархи 45 мартадан ортиқ рекорд янгилаган. Бу ҳолат олтинни аҳоли ва инвесторлар учун энг ишончли активлардан бири сифатида янада жозибадор қилмоқда.
Жаҳон бозорида ҳам олтин нархи тарихий юқори чўққиларни забт этмоқда. Хусусан, 25 декабрь соат 9:52 ҳолатига кўра, жаҳон бозорида олтиннинг бир унцияси 4,48 минг доллар атрофида савдолашилган. Эслатиб ўтиш жоиз, Ўзбекистонда олтин қуймалари бўйича аввалги рекорд 23 декабрь куни қайд этилган эди.
