O‘zbekistonga eng ko‘p investitsiya qaysi davlat tomonidan kiritilgani ma’lum bo‘ldi

Milliy statistika qo‘mitasi ma’lumotlariga ko‘ra, 2024 yilda O‘zbekistonda o‘zlashtirilgan jami xorijiy investitsiya va kreditlar hajmi 27,7 mlrd AQSH dollarini tashkil etdi. Bu mamlakat iqtisodiyotiga xorijiy kapital kirishi hajmida sezilarli o‘sish bo‘lganini ko‘rsatadi. Mazkur ko‘rsatkichda Xitoy yetakchi davlat sifatida qayd etildi. Xitoyning asosiy kapitalga yo‘naltirilgan xorijiy investitsiya va kreditlardagi ulushi 28,7 foizga yetgan. Bu O‘zbekiston iqtisodiyotida Xitoy ishtirokining kuchayib borayotganidan dalolat beradi. Rossiya esa 12,7 foiz ulush bilan ikkinchi o‘rinni egalladi. Turkiya 7 foiz ko‘rsatkich bilan uchinchi o‘rindan joy oldi. Yevropa mamlakatlari orasida Germaniyaning ulushi 5,1 foiz bo‘lsa, Buyuk Britaniya 3,8 foiz ko‘rsatkich bilan qayd etildi. Yaqin Sharq davlatlari ichida Saudiya Arabistonining ishtirok darajasi yuqori bo‘lib, 4,8 foiz ulushga ega bo‘ldi. Bu mamlakatning so‘nggi yillarda O‘zbekistondagi energetika va infratuzilma loyihalarida faol ishtirok etib kelayotgani bilan izohlanadi. Shu tariqa, O‘zbekiston iqtisodiyotida xorijiy sarmoyalar tarkibida Xitoy yetakchilik qilayotgan bo‘lsa-da, Rossiya, Turkiya va Yevropa hamda arab davlatlarining ham ishtiroki muhim ahamiyat kasb etmoqda. Mutaxassislar fikricha, bu tendensiya mamlakatda turli manbalardan investitsiya jalb etish siyosati samara berganidan dalolatdir.