Ўзбекистонликларнинг ярмидан кўпини кредит олишга эҳтиёжи бор

Марказий банк I чорак учун «Истеъмол кайфияти» шарҳини эълон қилди.

Сўровномада 4 100 га яқин респондент қатнашган бўлиб, уларнинг келгусида кредит олишга бўлган эҳтиёжи таҳлил қилинган.

Маълумотларга кўра, келгусида кредит олишга эҳтиёжи борлар улуши 54 фоиздан 56 фоизга ортган. Бу аҳолининг ярмидан кўпини кредитга бўлган эҳтиёжи борлигини билдиради.

Шунингдек, кам даромадли қатламда кредитга талаб ошиб бораётган бўлса, 20 млн сўмдан кўпроқ даромад қилувчиларда камайишда давом этмоқда. 

Сўров иштирокчилари кредит маблағларини асосан уй-жойни таъмирлаш учун жалб қилишни режалаштирмоқда. Таълим, тўй маросимлари, автомобиль хариди ва даволаниш харажатлари ҳам кредит олишга туртки бўлаётган асосий омиллар сифатида қайд этилган.

Шу билан бирга, саёҳат учун ҳам кредит олмоқчи бўлганлар сони сезиларли ортган. Электрон қурилмалар сотиб олмоқчи бўлганлар улуши эса қисқаргани кузатилган.

^{manba: markaziybank}