Озиқ-овқат инқирозигача 6-12 ой: БМТ хавфли огоҳлантириш эълон қилди
Ҳўрмуз бўғози атрофидаги кескинлик туфайли дунё бозорларида маҳсулотлар нархи кескин кўтарилиб кетиши мумкин.
БМТнинг Озиқ-овқат ва қишлоқ хўжалиги ташкилоти (ФАО) Ҳўрмуз бўғози атрофида кузатилаётган геосиёсий кескинлик фонида дунё бозорларида маҳсулотлар нархи кескин кўтарилиши ва глобал озиқ-овқат беқарорлиги юзага келиши хавфини эълон қилди.
ФАО бош иқтисодчиси Максимо Тореро кемалар ҳаракатидаги узилишлар аллақачон «тизимли агросаноат шоки»ни келтириб чиқараётганини, унинг оқибатлари эса яқин бир йил ичида тўлақонли жаҳон инқирозига айланиши мумкинлигини айтди.
Ҳўрмуздаги кескинлик бозорларга босим ўтказмоқда
Ташкилот таҳлилларига кўра, энергия ташувчилар ва ўғитлар нархининг ошиши, экин майдонларининг қисқариши ҳамда транспорт харажатларининг ортиши жаҳон озиқ-овқат бозорларига босим ўтказа бошлаган.
ФАО ушбу вазият айниқса ғалла ва ўғит импортига қарам бўлган давлатлар учун жуда хавфли эканини таъкидлади.
Муқобил йўналишлар чекланган
Ташкилотнинг агроозиқ-овқат иқтисодиёти департаменти директори Девид Лаборд Қизил денгиз, Арабистон ярим оролининг шарқи ва Саудия Арабистонининг ғарбий қисми орқали ўтувчи муқобил йўналишларнинг ўтказувчанлик имконияти чекланганини қайд этди.
Халқаро ташкилот дунё давлатларини экспорт чекловларидан воз кечишга, инсонпарварлик ёрдамлари етказилишини таъминлашга ва зудлик билан янги логистика йўлакларини излашга чақирди.
Қурғоқчилик ва Эл-Нино хавфни оширмоқда
Инқирозни кучайтирувчи яна бир омил сифатида, ФАО дунёнинг қатор минтақаларида кучли қурғоқчилик ва қишлоқ хўжалигида узилишлар келтириб чиқариши мумкин бўлган Эл-Нино иқлим ҳодисасининг фаоллашувидан хавотирда.
БМТ агар халқаро миқёсда мувофиқлаштирилган ҳаракатлар амалга оширилмаса, дунё яқин ойлардаёқ озиқ-овқат инфляцияси ва танқислигининг янги тўлқинига дуч келиши мумкинлигини алоҳида таъкидлади.
