Пекинда Путин ва Си музокаралари: янги глобал тизим ҳақида баёнот

Бугун, 20-май куни Россия президенти Владимир Путин Хитой раиси Си Жинпинг билан Пекиндаги Тянанмэн майдонида учрашди. У ерда Россия президентини расмий кутиб олиш маросими бўлиб ўтди. Шундан сўнг музокаралар Халқ йиғинлари уйида бошланди – аввал тор доирада, кейин эса кенгайтирилган таркибда.

«Россия ва Хитой муносабатлари мисли кўрилмаган юқори даражага чиқди, уларни ҳар томонлама стратегик ҳамкорлик намунаси деб аташ мумкин», – деди Владимир Путин.
Унинг таъкидлашича, икки давлат ўртасида товар айирбошлаш ҳажми сўнгги 25 йилда 30 баробардан кўпроқ ошган ва бир неча йилдан буён 200 миллиард доллардан юқори даражада сақланиб келмоқда.
Путин, шунингдек, Яқин Шарқдаги инқироз фонида Россия ҳануз ресурсларни ишончли етказиб берувчи давлат, Хитой эса масъул истеъмолчи сифатида мавқеини сақлаб қолаётганини айтди.
Унинг сўзларига кўра, икки давлат ўртасидаги иқтисодий ҳамкорликнинг устувор йўналишлари қишлоқ хўжалиги, транспорт ва юқори технологиялар соҳасидаги йирик қўшма лойиҳалардан иборат.
Ўз навбатида, Си Жинпинг Хитой ва Россия янада адолатли глобал бошқарув тизимини шакллантириши кераклигини таъкидлади.

«Россия ва Хитой муносабатлари тартибсиз дунёда барқарорлик ва олдиндан билиш имкониятини яратади», – деди у.

Кўп қутбли дунё декларацияси

Унинг фикрича, 25 йил аввал имзоланган қўшничилик, дўстлик ва ҳамкорлик тўғрисидаги шартнома икки давлат алоқаларини жадал ривожланиш босқичига олиб чиққан.
«Россия ва Хитой ўзаро ҳурмат асосида муносабатлар йўналишини биргаликда белгиламоқда. Пекин ва Москва халқаро адолатни ҳимоя қилишда жасорат кўрсатмоқда», – деди Си Жинпинг.
Икки давлат раҳбарлари қўшничилик, дўстлик ва ҳамкорлик тўғрисидаги шартномани узайтиришга келишиб олди. Мазкур келишув 25 йил аввал имзоланган.
Музокаралардан сўнг икки давлат раҳбарлари «кўп қутбли дунё шаклланиши ва халқаро муносабатларнинг янги тури» ҳақидаги декларацияни имзоладилар. Шунингдек, улар «ҳар томонлама ҳамкорлик ва стратегик ўзаро ҳамкорликни мустаҳкамлаш» бўйича баёнот қабул қилдилар.
Россия президенти ёрдамчиси Юрий Ушаковнинг маълум қилишича, ҳамкорликни мустаҳкамлаш бўйича бу ҳужжат «47 саҳифали дастурий ҳужжат» бўлиб, унда икки давлат муносабатларини ривожлантиришнинг асосий йўналишлари, халқаро масалаларга умумий ёндашув ва жаҳон ишларида ҳамкорлик форматлари белгилаб берилган.