Пентагон Кубадаги операцияга тайёргарлик кўрилаётганини маълум қилди

АҚШ уруш вазирлиги оммавий ахборот воситаларининг Кубадаги операцияга тайёргарлик кўрилаётгани ҳақидаги хабарини тасдиқлади. Тафсилотлар ошкор қилинмаяпти. Бу ҳақда «РИА Новости» хабар берди.

Аввалроқ, айрим нашрлар АҚШ уруш вазирлиги Кубадаги эҳтимолий операцияга тайёргарликни бошлагани ҳақида ёзганди.

Пентагон «РИА Новости» нашрига АҚШ Кубага қарши «бир қатор ҳаракатлар»ни режалаштираётганини ва президент Доналд Трампнинг тегишли буйруқларини бажаришга тайёрлигини тасдиқлади.

«Биз гипотетик сценарийлар бўйича башорат қилмаймиз. Вазирлик кутилмаган вазиятлар учун бир қатор ҳаракатларни режалаштирмоқда ва президент буйруқлари келиб тушиши билан уларни ижро этишга тайёр», — дейилади идора хабарида.

Эслатиб ўтамиз, шу йилнинг январ ойида Дональд Трамп агар Куба раҳбарияти зудлик билан «келишувга эришилмаса», бунинг оқибатлари ёмон бўлишидан огоҳлантирган эди. Шунингдек, у Венесуэла етакчиси Николас Мадуро ҳокимиятдан четлатилганидан сўнг, Кубага келадиган Венесуэла маблағлари ва нефт таъминоти тўхтатилишини таъкидлаган.

Кейинроқ Оқ уй раҳбари Венесуэладан нефт етказиб бериш тўхтатилгандан сўнг Куба ҳалокатга жуда яқин эканини таъкидлади.

Сўнгра Доналд Трамп Куба томонидан миллий хавфсизликка таҳдид туфайли АҚШда фавқулодда ҳолат режимини жорий этиш тўғрисидаги фармонни имзолади. Бунга жавобан Куба ҳукумати АҚШни агрессия ва шантажда айблади.

Март ойида Трамп яна Кубани босиб олиш ҳақида гапириб, матбуот анжуманида бу у учун шараф бўлишини айтди.