Покистоннинг "Sindh Bank" банки Ўзбекистонда филиал очиши мумкин

Покистоннинг "Sindh Bank" банки Ўзбекистонда ўз филиалини очиш истиқболларини кўриб чиқмоқда. Бу масала Ўзбекистон Марказий банки ва мазкур банк вакиллари ўртасида ўтказилган онлайн учрашувда муҳокама қилинди.

Учрашув Ўзбекистоннинг Исломободдаги элчихонаси кўмагида ташкил этилди. Музокараларда икки мамлакат банк тизимлари ўртасидаги ҳамкорликни кенгайтириш, шунингдек, "Sindh Bank"нинг Ўзбекистонда филиал очиш имкониятлари юзасидан фикр алмашилди.

"Sindh Bank" ижрочи директори ўринбосари Асад Али Шоҳ Ўзбекистон ва Покистон ўртасида савдо-иқтисодий ҳамкорлик жадал ривожланаётганини таъкидлаб, уни молиявий инфратузилма орқали қўллаб-қувватлаш муҳимлигини қайд этди.

Шу мақсадда банк Ўзбекистон тижорат банклари билан корреспондент банк муносабатларини йўлга қўйишга қизиқиш билдирган. Ўзбекистон томони эса "Sindh Bank" ва мамлакатнинг етакчи банклари ўртасида шериклик алоқаларини ўрнатишга кўмаклашишга тайёрлигини маълум қилди.

Покистон вакиллари ҳамкорликни дастлаб RMA — банклар ўртасидаги муносабатларни бошқариш тизими орқали йўлга қўйишни режалаштираётганини билдирди. Кейинчалик банк операцияларини босқичма-босқич кенгайтириш имконияти ҳам кўриб чиқилмоқда.

Музокараларда икки мамлакат ўртасидаги савдо операцияларини миллий валюталарда амалга ошириш масаласига ҳам алоҳида эътибор қаратилди. Қайд этилишича, сўнгги йилларда Ўзбекистон компаниялари орасида ўзбек сўми ва Покистон рупиясидан фойдаланишга қизиқиш ортиб бормоқда.

Шунингдек, Ўзбекистон банклари Европа, Хитой, Жанубий Осиё ва Марказий Осиё давлатлари банклари билан мустаҳкам алоқаларга эга экани таъкидланди. Бу Покистон компаниялари учун Марказий Осиё бозорларига чиқишда қўшимча имкониятлар яратиши мумкин.

Музокаралар якунида томонлар ҳамкорликни ривожлантириш мақсадида зарур маълумотлар билан алмашишга келишиб олди. Шунингдек, келгусида Ўзбекистон банклари билан ҳамкорлик масалаларини муҳокама қилиш учун навбатдаги онлайн учрашувни ўтказиш режалаштирилди.