Пойтахт метроси учун 280 млн долларлик янги поездлар харид қилинади

Тошкент шаҳар халқ депутатлари Кенгаши пойтахт метрополитени учун 14 та беш вагонли электропоезд харид қилиш концепциясини маъқуллади.

Янги поездлар эскирган таркибларнинг бир қисмини алмаштириши ва йўловчиларга хизмат кўрсатиш сифатини яхшилаши кутилмоқда. Дастлабки режага кўра, поездлар 2027-йилда етказиб берилиши лозим.

Метро паркини янгилаш зарурати мавжуд вагонларнинг катта қисми бир неча ўн йилдан бери фойдаланилаётгани билан изоҳланган. Шу билан бирга, йўловчилар оқими ҳам сезиларли ошган. 2022-йилда метро 136,7 млн йўловчи ташиган бўлса, 2025-йилда бу кўрсаткич 287 млн нафарга етган.

Дастлаб олти вагонли поездларни харид қилиш ҳам кўриб чиқилган. Бироқ бундай таркиблар энг қисқа станция платформаларига сиғмайди. Станцияларни реконструкция қилиш қўшимча харажат талаб этгани учун беш вагонли поездлар варианти танланган. Лойиҳага кўра, жами 70 та вагон сотиб олиш режалаштирилган.

Поездлар қаердан харид қилинади?

Лойиҳа доирасида Хитой, Россия, Франция, Испания, Чехия, Жанубий Корея ва Япониянинг поезд ишлаб чиқарувчи компанияларининг таклифлари солиштирилган.

Энг арзон вариант Хитойнинг «CRRC» компаниясига тегишли бўлиб, унинг қиймати 118,3 млн долларни ташкил этган. Энг қиммати эса Япониянинг «Kawasaki» компаниясига тегишли — 279,1 млн доллар.

Ушбу суммалар поездлар ва уларни етказиб бериш харажатларини қамраб олади. Бироқ лойиҳани амалга ошириш билан боғлиқ қўшимча харажатлар ҳисобга олинмаган.

Тижорий таклифлар «CRRC» ва Россиянинг «Глобалниэ транспортниэ решения» компаниясидан келиб тушган. Қолган ишлаб чиқарувчилар очиқ маълумотлар асосида баҳоланган.

Қайд этилишича, якуний етказиб берувчи ҳозирча аниқланмаган. Агар Россиядан бошқа ишлаб чиқарувчи танланса, алоҳида депо ва техник хизмат кўрсатиш базасини қуриш талаб этилади. Уларнинг дастлабки қиймати 10,13 млн долларга баҳоланган. Бу суммага ер танлаш, лойиҳалаш ва қурилишни ташкил этиш харажатлари киритилмаган.

Харидни кредитлар ҳисобидан молиялаштириш, қарзларни эса давлат бюджетидан қайтариш режалаштирилмоқда. Дастлабки жадвалга кўра, янги поездлар учта партияда 2027-йил 1-ноябргача етказиб берилиши керак.

Эслатиб ўтамиз, аввалроқ «Ўзбекистон темир йўллари» АЖ Берлинда ўтган ИнноТранс-2026 кўргазмасида саккизта янги тезюрар электропоезд, локомотивлар ҳамда темир йўл рельслари сотиб олиш бўйича келишувларга эришганди.