Президент энергетикларнинг биргина хато қарори 300 млн долларлик ортиқча харажатга сабаб бўлганини айтди

Президент Шавкат Мирзиёев раислигида ўтган видеоселектор йиғилишида Сурхондарё вилоятидаги буғ-газ электр станцияси лойиҳасидаги камчиликлар танқид қилинди.

Қайд этилишича, электр станцияси учун жой нотўғри танлангани оқибатида газни иншоотга етказиб бериш учун 300 миллион доллар сарфлашга тўғри келмоқда.

Шунингдек, ташаббускор билан тузилган шартнома шартлари етарлича пухта ўрганилмагани ҳам қўшимча харажатлар юзага келиш хавфини оширган. Шу муносабат билан масъулларга шартнома шартларини қайта кўриб чиқиш топширилди.

Энергетика тизимида кадрлар алмашди

Йиғилишда соҳадаги жиддий камчиликлар учун энергетика вазири ҳамда «Ҳудудий электр тармоқлари» раҳбари лавозимидан озод этилди.

«Миллий электр тармоқлари», «Иссиқлик электр станциялари», «Трансгаз» ва «Ҳудудгаз» раҳбарларига эса йил якунигача синов муддати белгиланди.

Давлат раҳбари белгиланган муддат ичида натижа бўлмаса, улар ҳам лавозимидан озод этилиши ҳақида огоҳлантирди.

Янги энергетика вазири Шерзод Хўжайев, «Ҳудудий электр тармоқлари»нинг янги раҳбари Сардор Исақулов ҳамда Энергия инспекциясининг янги бошлиғи Аҳад Исоқжонов бугундан бошлаб мутлақо янги иш услубини жорий қилиши шартлиги таъкидланди.

Ҳокимлар ҳам жавобгар бўлади

Президент бу борада ҳокимларни ҳам огоҳлантирди.

«Ҳокимлар ҳам “Бу энергетикларнинг иши” деб хотиржам ўтиришга ҳаққи йўқ. Сўров қаттиқ бўлади», — деди Шавкат Мирзиёев.