Prezident qarori bilan Toshkentda yangi universitet ochilmoqda

11 sentyabr kuni Prezidentning PQ–274-sonli qaroriga asosan Toshkent shahrida «ToshTech» texnika universiteti tashkil etildi. Bu haqda Adliya vazirligi xabar berdi. Yangi universitet akademik, moliyaviy va tashkiliy-boshqaruv sohalarida mustaqil faoliyat yuritadi. Qarorga ko‘ra, 2025/2026 o‘quv yilidan universitetda Davlat byudjetidan moliyalashtiriladigan bir yillik tayyorlov kursi yo‘lga qo‘yiladi. Bu dastur orqali talabalar asosiy ta’lim jarayoniga tayyorgarlik ko‘rish imkoniga ega bo‘ladi. 2026/2027 o‘quv yilidan boshlab, universitetda bakalavriat ta’lim yo‘nalishlari ochiladi. Keyingi bosqichda, 2027/2028 o‘quv yilidan magistratura va oliy ta’limdan keyingi ta’lim dasturlari joriy etilishi ko‘zda tutilgan. Universitetda ta’lim jarayoni davlat granti hamda to‘lov-kontrakt asosida amalga oshiriladi. Mashg‘ulotlar davlat va xorijiy tillarda olib boriladi. Bu esa talabalar uchun xalqaro ta’lim tajribalari bilan tanishish imkoniyatini yaratadi. Qarorga ko‘ra, 2029/2030 o‘quv yiligacha qabul qilinadigan talabalar to‘liq davlat granti asosida ta’lim oladi. Bu chora yangi universitetning nufuzini oshirish va iqtidorli yoshlar uchun imkoniyatlarni kengaytirishga xizmat qiladi.