Путин миллиардерларга Донбассни тўлиқлигича талаб қилаётганини сўзлаб берди

Россия президенти Владимир Путин йирик бизнес вакиллари билан ёпиқ учрашувда Украинадаги урушни тугатиш бўйича АҚШ билан музокаралар мавзусига алоҳида тўхталди. «Коммерсантъ» нашрининг ёзишича, у Россия Донбасснинг бутун ҳудудини талаб қилишда қатъий эканини билдирган.

Нашр маълумотига кўра, Путин музокараларда Россия ҳарбий йўл билан эгаллай олмаган Донбасс ҳудудлари ҳам Москва назоратига ўтиши кераклигини айтган. Шу билан бирга, у айрим ҳудудлар бўйича чекланган алмашинув эҳтимолини ҳам истисно қилмаган.

Путин Краматорск–Константинивка–Словянск саноат тугуни бўйича масала муҳокама қилинмаслигини таъкидлаган. У, шунингдек, АҚШ айрим ташаббуслар бўйича Европа билан маслаҳатлардан кейин позициясини ўзгартираётганини «кучсизлик» деб атаган.

«The Bell» нашри маълумотига кўра, учрашувда қатнашган бизнесменлар рўйхати ошкор этилмаган. Манбаларнинг айтишича, санкциялардан қутулган айрим иштирокчилар яна чекловлар остига тушмаслик учун очиқ кўринишдан қочган.

Бундан аввал Bloomberg манбаси Москва Украина президенти Володимир Зеленский таклиф қилган 20 пунктли тинчлик режасини қайта кўриб чиқишни талаб қилаётганини хабар қилган эди. Кремл НАТО шарқ томон кенгаймаслиги, Украина нейтрал мақоми ва Украина қуролли кучлари сони бўйича қатъий чекловларни истамоқда.

24 декабр куни Зеленский режанинг барча 20 бандини эълон қилган эди. Унда Украина суверенитети кафолатланиши, халқаро хавфсизлик кафолатлари берилиши ва ҳудудий масалалар референдум орқали ҳал қилиниши таклиф этилган.