Путин ва Пашинян Арманистоннинг ЕИга қўшилиш масаласини юзма-юз гаплашиб олди

Россия президенти Владимир Путин ва Арманистон бош вазири Никол Пашинян Бишкек шаҳрида музокаралар ўтказди. Учрашувнинг асосий мавзуларидан бири Арманистоннинг Европа Иттифоқига аъзо бўлиш нияти ва бу қарорнинг Россия Федерацияси билан муносабатларга эҳтимолий оқибатлари бўлди.

Улар Шанхай ҳамкорлик ташкилоти саммити доирасида учрашган. Мулоқот чоғида Россия етакчиси Москва Арманистон билан дўстона ва ўзаро манфаатли алоқаларни ривожлантириш тарафдори эканини билдирган. Шу билан бирга, унинг таъкидлашича, Ереваннинг Европа сари йўналиши Евроосиё иқтисодий иттифоқи (ЕОИИ) доирасидаги кейинги ҳамкорлик учун қийинчиликлар туғдириши мумкин.

ЕОИИ бозоридаги имтиёзлар ва минтақадаги янги воқелик

«Арманистоннинг ЕИга интилиши — мамлакат ва халқнинг табиий, қонуний ҳуқуқи. Бу суверен давлат ва ўз тараққиёт йўналишини арман халқининг ўзи белгилайди. Аммо бу, шубҳасиз, Евроосиё иқтисодий иттифоқида бўлишда қийинчиликлар туғдиради ҳамда республиканинг ЕОИИ бозоридаги имтиёзларининг бекор бўлиши ва йўлга қўйилган савдо занжирларининг узилиши билан таҳдид солади», — деган Путин.

Россия президенти Москва арман халқининг танловини ҳурмат қилишини, бироқ бу ўринда Россияга Ереваннинг кейинги сиёсий-иқтисодий йўналишини тушуниб олиш зарурлигини таъкидлади.

Ўз навбатида, Никол Пашинян Арманистон Россия Федерацияси билан муносабатларни янада ривожлантириш ва чуқурлаштиришдан манфаатдор эканини тасдиқлади. Унинг билдиришича, Ереван Европа Иттифоқига кириш интилишида Россия ва ЕОИИ билан келишувларнинг бузилишини кўрмаяпти.

Минтақадаги вазият сўнгги йилларда тинчлик ўрнатилганидан сўнг ўзгарганини эслатган Арманистон бош вазири, Москва ва Ереван ўртасидаги муносабатларни янги воқеликларни инобатга олган ҳолда кўриб чиқиш лозимлигини қўшимча қилди. Унинг фикрича, бу ҳолат икки томонлама алоқаларнинг янада ривожланишига хизмат қилиши мумкин.