Qirg‘iziston «TikTok»ni qaysi shart bilan ochishini ma’lum qildi

Qirg‘izistonda «TikTok» ijtimoiy tarmog‘iga kirish imkoni faqat taqiqlangan kontentni alohida bloklash imkonini beruvchi maxsus uskunalar ishga tushirilganidan keyin tiklanadi. Bu haqda parlament yig‘ilishida Qirg‘iziston Milliy xavfsizlik davlat qo‘mitasi raisi o‘rinbosari Alisher Erbayev ma’lum qildi.

Masalani deputat Dastan Bekeshev ko‘tardi. Uning ta’kidlashicha, «TikTok» sud qarori bo‘lmasdan bloklangan va bu, uning fikricha, qonunga zid hisoblanadi. Deputat mazkur platforma tadbirkorlar tomonidan biznesni targ‘ib qilish uchun faol qo‘llanilishini qayd etib, ijtimoiy tarmoq qachon qayta ishga tushirilishini so‘radi.

Vaqtinchalik cheklovning sababi

Alisher Erbayevning aytishicha, cheklov bolalarni ularning sog‘lig‘i, jismoniy, intellektual, ruhiy, ma’naviy va axloqiy rivojlanishiga zarar yetkazuvchi axborotdan himoya qilish to‘g‘risidagi qonun asosida joriy etilgan.

«Qonunda bolalar orasida tarqatilishi taqiqlangan yoki maqbul bo‘lmagan axborotni cheklashni nazarda tutuvchi bir nechta normalar mavjud. Biz «TikTok» orqali bolalarga salbiy ta’sir ko‘rsatishi mumkin bo‘lgan kontent tarqatilayotganini ko‘rmoqdamiz, shuning uchun vaqtinchalik cheklov joriy etilgan», – dedi u.

 
«TikTok»ni ochish sharti

Uning so‘zlariga ko‘ra, muayyan taqiqlangan kontentni aniqlab, faqat shu materiallarni bloklash imkonini beruvchi maxsus uskunalar sotib olinib, ishga tushirilgach, platformaga kirish qayta tiklanadi.

«Biz faqat noxush kontentni bloklay oladigan darajaga yetganimizdan keyin «TikTok» to‘liq ochiladi», – dedi Erbayev.

O‘z navbatida, Dastan Bekeshev alohida materiallarni cheklash to‘g‘ri yondashuv ekanini, ammo butun platformani bloklash samarasizligini ta’kidladi. Uning fikricha, shunday kontent boshqa ijtimoiy tarmoqlarda ham tarqalmoqda.

«Agar shu mantiqqa amal qilinsa, unda butun internetni yopishga to‘g‘ri keladi», – dedi deputat.

Ma’lumot uchun, «TikTok» Qirg‘izistonda 2024-yil aprel oyida rasman bloklangan. Joriy yil may oyida Kreativ sanoat parki, Kreativ sanoat assotsiatsiyasi va raqamli hamjamiyat vakillari «TikTok»ni blokdan chiqarishni qo‘llab-quvvatlash tashabbusini boshlab, mamlakat prezidenti Sadir Japarovga amaldagi cheklovlarni qayta ko‘rib chiqish iltimosi bilan murojaat qilgan.