Rasman: Qurbon hayiti O‘zbekistonda 6 iyun kuni nishonlanadi
31.05.2025 | 09:0048413
Prezident qaroriga ko‘ra, 2025 yilda Qurbon hayiti 6 iyun, juma kuni nishonlanadi. Shanba — 7 iyun kuni esa olti kunlik ish haftasida ishlovchi xodimlar uchun qo‘shimcha dam olish kuni etib belgilandi.
Prezident Shavkat Mirziyoyev «Muborak Qurbon hayitini nishonlash to‘g‘risida»gi qarorni imzoladi. Qarorga asosan, 2025 yilda Qurbon hayitining birinchi kuni 6 iyun — juma kuniga to‘g‘ri keladi va bu kun mamlakat bo‘ylab bayram sifatida keng nishonlanadi.
O‘zbekiston musulmonlari idorasining Qurbon hayiti sanasiga doir axboroti ma’lumot uchun qabul qilindi va ushbu sana rasman bayram kuni deb e’lon qilindi. Bu qaror aholiga diniy bayramni munosib nishonlash imkonini yaratish maqsadida qabul qilindi.
Shuningdek, 7 iyun — shanba kuni olti kunlik ish haftasi bo‘yicha ishlovchi xodimlar uchun qo‘shimcha dam olish kuni etib belgilandi. Bu orqali fuqarolarga uzoqroq dam olish va bayramni oila davrasida o‘tkazish imkoniyati yaratiladi.
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir qator tashkilotlar bilan hamkorlikda Qurbon hayitini milliy an’ana va urf-odatlarga mos holda o‘tkazish bo‘yicha tegishli chora-tadbirlarni amalga oshiradi.
Hayit bayramining mazmun-mohiyatini saqlab qolgan holda, joylarda targ‘ibot ishlari, xayriya tadbirlari va jamoaviy ibodatlar tashkil etilishi rejalashtirilmoqda.
