Россияда нефтни қайта ишлаш ҳажми 20 йиллик энг паст даражага тушди
Таҳлилчиларга кўра, июль ойида Россиядаги нефть инфратузилмасига қилинган ҳужумлар сони Украина уруши бошланганидан бери энг юқори кўрсаткичлардан бирига етган.
© neftregion.ru2026-йил июль ойида Россияда нефтьни қайта ишлаш ҳажми 2002-йил май ойидан бери энг паст даражага тушди. Бу ҳақда «Bloomberg» нашри EA Analytics таҳлилий компанияси маълумотларига таяниб хабар берди.
Кунлик қайта ишлаш ҳажми ўртача 3,6 миллион баррелни ташкил қилган. Бу мавсумий одатий кўрсаткичдан қарийб учдан бирга кам.
Агентлик маълумотларига кўра, бундай кескин пасайишга Россия нефть инфратузилмасига уюштирилган қатор ҳужумлар сабаб бўлган. «Bloomberg» Россия ва Украина расмий баёнотлари асосида ҳисоб-китоб қилганида, июль ойида нефтьни қайта ишлаш заводлари, нефть базалари, қувур инфратузилмаси ҳамда Россия нефти экспорти билан боғлиқ танкерлар камида 30 марта ҳужумга учраган. Бу Россия ва Украина ўртасидаги кенг кўламли уруш бошланганидан бери бир ой ичидаги иккинчи энг юқори кўрсаткич ҳисобланади.
Нашр маълумотларига кўра, июль ойининг биринчи ярмида Украина ҳужумларининг асосий нишонлари нефтьни қайта ишлаш заводлари бўлган. Оқибатда айрим Россия заводлари фаолиятини қисқартириш ёки вақтинча тўхтатишга мажбур бўлган ва бу хом нефть экспортининг ошишига олиб келган.
Ойнинг иккинчи ярмида эса ҳужумлар асосан танкерлар ва денгиз инфратузилмасига қаратилган. Бу Россиянинг жанубий портлари орқали амалга ошириладиган етказиб бериш жараёнларида узилишларга сабаб бўлган.
«Deutsche Welle» маълумотларига кўра, нефтьни қайта ишлаш ҳажмининг камайиши Европа Иттифоқининг Россияга қарши 21-санкциялар пакети кучга кирган даврга тўғри келган. Ушбу чекловлар, жумладан, Москва нефтьдан оладиган даромадларини камайтиришга қаратилган. Европа Иттифоқи бу маблағлар Украинадаги урушни молиялаштириш учун ишлатилаётганини таъкидлайди.
Экспертлар Россия Қора денгиз портларидан экспорт оқимларини қисман Болтиқбўйи ҳудудига йўналтириши мумкинлигини айтмоқда. Бироқ «Rystad Energy» компанияси вице-президенти Хорхе Леон аввалроқ «Bloomberg»га берган изоҳида бу инфратузилма ҳам ҳужумлар учун заиф бўлиб қолаётганини қайд этганди.
Эслатиб ўтамиз, аввалроқ Қозоғистон ва яна олти давлат нефть қазиб олиш ҳажмини оширишга келишиб олганди. Улар орасида Россия ҳам бор.
