«Tesla» рулсиз автомобилини оммавий ишлаб чиқаришни бошлади
«Tesla» ишлаб чиқарётган «Cybercab» автомобилида нафақат рул балки тепкилар, орқа кўриш ойналари, эшик тутқичлари ва ҳатто орқа ойна ҳам йўқ.
© Elon Mask X akkaunti«Tesla» ўзининг рул ва тепкисиз «Cybercab» автомобилини оммавий ишлаб чиқаришга киришганини маълум қилди. Компания бу моделни тўлиқ автоном транспорт сифатида тақдим этмоқда ва унинг инсон томонидан жисмонан бошқарилиши назарда тутилмаган.
Элон Муск мазкур автомобилни илк бор 2024 йилда жамоатчиликка намойиш этган эди. Энди эса у 38 сониялик видеони эълон қилиб, «Cybercab»нинг конвеердан чиқиб, мустақил равишда ҳаракатланаётганини кўрсатди.
«Cybercab» тузилиши
«Cybercab» икки йўловчига мўлжалланган икки эшикли электр седан бўлиб, унда рул, тепки, орқа кўриш ойналари, эшик тутқичлари ва ҳатто орқа ойна ҳам мавжуд эмас. Бу уни «Tesla»нинг энг ноодатий ва футуристик моделларидан бирига айлантирмоқда.
Автомобил дизайни жиҳатидан «Tesla Cybertruck»ни эслатади, аммо анча ихчам. Унинг «чайка қаноти» шаклида юқорига очиладиган эшиклари салонга кенг кириш имконини беради. Олд қисми эса радиатор панжарасисиз, ягона LED ёруғлик чизиғи билан безатилган.
Маскнинг айтишича, «Cybercab» «Tesla»нинг бошқа моделларига нисбатан арзонроқ бўлади. Аввалроқ у унинг нархи 30 минг доллардан паст бўлишини билдирган. Бироқ компания ҳозирча АҚШда бундай автоном машиналарни эксплуатация қилиш учун расмий рухсат олмаган. Шунингдек, тўлиқ автоном ҳайдаш тизими ҳали якуний тайёр эмас.
