АҚШда «Audi»нинг 4 млрд долларлик заводи қурилади

АҚШ президенти Доналд Трамп Германиянинг «Audi» автомобил ишлаб чиқарувчиси Жоржия штатида 4 млрд долларлик завод қуришни режалаштираётганини маълум қилди. Ушбу заводда йилига 200 мингта йўлтанламас автомобил ишлаб чиқариш кўзда тутилган. Бу ҳақда «Reuters» хабар берди.

Агентликнинг қайд этишича, Оқ уй раҳбари автомобил ишлаб чиқарувчиларга босим ўтказмоқда. У автомобиллар, пўлат, алюминий ва эҳтиёт қисмлар импортига божларни ошириш орқали компанияларни ишлаб чиқаришни АҚШга кўчиришга ундамоқда.

Трамп ўтган йили жорий этган божлар «Audi»га 1,4 млрд доллар зарар келтирган. Бунинг сабаби компания АҚШ бозори учун автомобилларнинг барчасини Европа ёки Мексикадан импорт қилади.

«Биз энг йирик ва юқори тоифадаги йўлтанламас автомобилларимизни бу ерга олиб келиб, Жоржия штатидаги Мейкон шаҳрида ишлаб чиқармоқчимиз. Бу узоқ муддатли инвестиция, чунки биз Америка бозорига ишонамиз», — деди «Audi» бош директори Гернот Дёллнер.

Трамп эса компаниянинг АҚШда завод қуришга қарор қилишига айнан божхона божлари сабаб бўлганини айтди.

Сенатор Берни Моренонинг таъкидлашича, божлар, оқилона тартибга солиш сиёсати ва Калифорниянинг ёқилғи тежамкорлиги бўйича мустақил стандартлар белгилаш имконияти чекланмаганида, Германия автомобил ишлаб чиқарувчисининг заводи АҚШда ҳеч қачон қурилмаган бўларди.

«Audi» маълумотларига кўра, мазкур инвестиция АҚШда тахминан 4,5 мингта янги иш ўрни яратиш имконини беради. Завод қурилиши 2027-йилда бошланиши, автомобил ишлаб чиқариш эса 2030-йиллар бошида йўлга қўйилиши режалаштирилган.

«Reuters» билан суҳбатлашган, исми ошкор этилмаган америкалик расмийнинг айтишича, заводда Audi Q7, Q8 ва Q9 русумли йўлтанламас автомобиллар йиғилади.

Ўтган йилнинг апрел ойида Трамп импорт қилинадиган автомобилларга 25 фоизлик бож жорий этиш тўғрисидаги фармонни имзолаган эди. Шунингдек, автомобил эҳтиёт қисмларига ҳам божлар белгиланган. Бу чоралар аввалдан амал қилиб келган божларга қўшимча равишда жорий этилган.

Имтиёзли бож ставкаларидан фойдаланмоқчи бўлган автомобил ишлаб чиқарувчилар ҳар бир маҳсулот таркибида АҚШда ишлаб чиқарилган қисмлар улуши қанча эканини кўрсатувчи ҳужжатларни тақдим этиши керак. Агар ҳужжатлар маъқулланса, 25 фоизлик бож фақат АҚШдан ташқарида ишлаб чиқарилган қисмлар қийматига нисбатан қўлланади.

Ўтган йилнинг апрел ойида Япониянинг «Nissan Motor» автомобил концерни ҳам Трамп маъмурияти жорий этган янги божлардан қочиш мақсадида ишлаб чиқаришнинг бир қисмини АҚШга кўчириш имкониятини кўриб чиқаётгани ҳақида «Nikkei» нашри хабар берган эди.

Эслатиб ўтамиз, аввалроқ Ўзбекистонда саккиз ой ичида энг кўп қайси автомобиллар ишлаб чиқарилгани ҳақида ёзган эдик.